Di çarçoveya mutabakata ku di navbera Hikûmeta Şamê û Hêzên Sûriyeya Demokratîk de pêvajoya pêguhertina girtîyan dest pê kir. 29 şervan gihiştin herêma Cizîrê.
Pêkanîna Peymana 29ê Çile ku di navbera Hêzên Sûriyeya Demokratîk (HSD) û Hikûmeta Demkî ya Sûriyeyê de pêk hat, berdewam dike. Rayedarên her du aliyan ragihandibûn ku ji bo rêvebirina pêvajoya pêguhertina girtîyan komîteyên taybet dê werin avakirin. Ev komîte li ser destnîşankirina navên girtîyan, rêxistina pêvajoyê û koordînasyona pêşveçûnên dê li qadê kar dikin.
Şervan gihiştin herêma Cizîrê
Li gorî agahiyên ji çavkaniyên herêmî hatine girtin di encama xebata hevbeş de yekemîn pêguhertina girtiyan pêk hat. 29 şervanên HSDê yên li girtîgehên Hikûmeta Demkî serbest hatin berdan. Şervanên hatin berdan li herêma Cizîrê ji aliyê Fermandarê Hêzên Ewlekariya Navxweyî yê Herêma Cizîrê Siyabend Efrîn ve hatin pêşwazîkirin.
Ji bo tevahiya girtiyan lihevkirin pêk hat
Çavkaniyên herêmî diyar dikin ku pêvajoya guhertina girtîyan di çarçoveya danûstandinên ku di demên dawî de di navbera Şamê û rayedarên Rojavayê Sûriyeyê de hatine meşandin de pêk hat. Tê gotin ku her du alî li ser zêdekirina hejmara pêguhertinên din jî li hev kirine. Li gorî çavkaniyan ger pêvajoya heyî bi awayekî aram berdewam bike dê pêguhertinên din jî di rojên pêş de çê bibin.
