Platforma Parastin û Hevgirtinê a Bajêr ya Amedê têkildarî rewşa mirovî ya Kobanê daxuyanî da û got: “Alîkariya mirovî berpirsiyariyek hiquqî, vicdanî û mirovî ye. Divê Deriyê Sînor ê Murşîtpinarê demildest were vekirin.”
Platforma Parastin û Hevgirtin a Bajêr ya Amedê bi diruşma “Bila bilez korîdora alîkarî ya mirovî bê vekirin” li eywana Çand Amedê daxuyaniya çapemeniyê li dar xist. Endam û rêvebirên Platfromê, Baroya Amedê, hevşaredarên Bajarê Mezin û navçeyên Amedê, endam û hevserok û rêveberên partiyên siyasî, rêveberên saziyên sivîl û gelek kes tevlî daxuyaniyê bûn. Kurmanciya metna daxuyaniyê Serokê Baroya Amedê AbdulKadîr Gûleç, metna Tirkî jî hevberdevka platformê Yildiz Ok Orakê Xwend.
AbdulKadîr Gûleç bal kişand li ser krîza mirovî ya li bajarê Kobanê her roj zêde dibe û dibe kareseteke mezin û wiha got: “Krîza mirovî ya ku li bajarê Kobanê tê jiyîn, her ku diçe vediguhere karesateke girantir û kûrtir. Ji ber pêla koçberiyê ya dijwar a hefteyên dawî, hejmara nêzîkî 500 hezarî bûye. Binesaziya heyî êdî nikare vî barî hilgire; di çareserkirina hewandinê, xurek, ava paqij û xizmetên tenduristiyê de krîzeke cidî tê jiyîn. Sedema bingehîn a vê koça girseyî ew e ku hêzên hikûmeta demkî yên li Şamê, bi taybetî êrîşî herêmên ku Kurd lê dijîn dikin. Hedefgirtina warên welatiyên sivîl, jiyanê zehmet kiriye û bi sed hezaran mirov neçar hiştine ku xwe bispêrin Kobanê.”
‘Alîkariyên hatine şandin kêm mane’
Di berdewama axaftina xwe de AbdulKadîr Gûleç da zanîn ku li gorî daneyên Komîseriya Bilind a Penaberan a Neteweyên Yekbûyî (UNHCR), li Sûriyeyê di nava sê hefteyên dawî de zêdetirî 100 hezar mirov koçber bûne û wiha got: “Rewşa ewlehiyê, nûqteyên kontrolê yên leşkerî yên li ser rêyan, gihandina alîkariyên mirovî bo herêman gelekî zehmet dike. Ev tablo pîvanên krîza mirovî ya li Kobaniyê girantir dike. Alîkariyên ku ji hêla mekanîzmayên alîkariya mirovî yên navneteweyî ve hatine şandin, li hemberî mezinahiya krîzê kêm mane. Di demekê de ku ev kêmasiya gerdûnî didome, girtîhiştina Deriyê Sînorî yê Murşidpinarê ku dê gihandina herî bilez û ewle bo herêmê hêsan bike. Riya Kîlîs-Çobanbeyê ya ku ji hêla rayedarên Komara Tirkiyeyê ve ji bo alîkariyên mirovî yên bo Kobaniyê tê pêşniyarkirin, ji aliyê ewlehiyê ve rîskên cidî dihewîne. Li aliyê din ji ber dûrbûna xwe ya ji Kobaniya di bin dorpêçê de, çareseriyeke bi bandor pêşkêş nake.”
‘Av xurek betanî û amûrên paqijiyê sereke ne’
AbdulKadîr Gûleç destnîşan kir ku ji nûçeyên ku van rojên dawî di çapemeniyê de cih girtine tê fêmkirin ku ew 13 TIRên ji bo alîkarî ji aliyê Tirkiyeyê ve hatine şandin, li hemberî pêdiviyên jiyanî yên bingehîn ên sed hezaran mirovan, gelek kêm in. Îro pêdiviya herî lezgîn a gelê Kobaniyê ya av, xurek, betanî, doşek, malzemeyên paqijiyê û alavên hewandinê heye. Di vê çarçoveyê de em dixwazin bi taybetî destnîşan bikin ku TIRên me yên alîkariyê yên ji pêdiviyên mirovî yên bingehîn pêk tên, li herêma me amade ne û tên rawestandin. Heger destûrên pêwîst werin dayîn, alîkarî dê demildest derkevin rê û bigihîjin gelê Kobanê. Em ji vir bi awayekî zelal û xurt bang dikin, Deriyê Sînorî yê Murşîtpinarê divê demildest ji bo alîkariya mirovî were vekirin. Divê destûr were dayîn ku saziyên civaka sivîl û torên piştevaniyê rasterast alîkariyê bigihînin Kobanê. Divê were dabînkirin ku di serî de AFAD, hemû saziyên têkildar ên kamûyê rasterast alîkariyê bişînin herêmê; di vê pêvajoyê de divê bi civaka sivîl re hevkariyeke tam were danîn. Pêvajoyên alîkariyê divê ji hesabên siyasî werin paqijkirin, bi awayekî şefaf û bilêvker werin meşandin.”
Banga vekirina korîdorê
Di dawiya axaftina xwe de AbdulKadîr Gûleç di dawiya axaftina xwe de anî ziman ku alîkariya mirovî ne tercîhek e û wiha axivî: “Alîkariya mirovî berpirsiyariyeke hiqûqî, wicdanî û mirovî ye. Bêdeng mayîna li hemberî vê karesata ku tenê çend kîlometreyan dûrî sînor diqewime, hevkariya drama mezin a mirovahiyê ye. Em bang li rayedaran dikin ku demildest berpirsiyariyê bigirin ser xwe û ji bo Kobaniyê korîdoreke alîkariya mirovî ya bênavber ava bikin. Her wiha, em îro destpêkirina Kampanyaya Alîkariya Mirovî ya Lezgîn a Kobaniyê radigihînin. Hemû hûrgulî, lîsteyên pêdiviyan û bangên piştevaniyê yên têkildarî kampanyayê dê bi raya giştî re bi awayekî şefaf û qonax bi qonax werin parvekirin.”
