Amed – Endama Grûba Dîrenîşê ya alîgirên Amedsporê Leyla Firat têkildarî 25ê Mijdarê axivî û got: “Hêza jinan veşartiye, divê ev hêz derkeve holê.”
Bi rasthatina 25ê Mijdarê Roja Têkoşîna Li Dijî Tundiya Li Ser Jinan a Cîhanê bi taybetî jinên Kurd li ser pêya ne û li dijî tundî û kuştina jinan radibin û li her qadê azadiyê qîr dikin. Bi rojane di serî de jinên Kurd û li gelek deverên cîhanê jin ji bo 25ê Mijdarê amadekariyan dikin. Li Amedê bênavber amadekariyên meşa 25ê Mijdarê tên kirin.
Jinên ku di nava komeleyên alîgirên tîma Amedsporê de ne jî bi armanca azadiyê 25ê Mijdarê pêşwazî dikin. Yek ji grûba alîgirên Amedsporê jî Dîrenîş e. Alîgira Amedsporê û endama Grûba Dîrenîşê Leyla Firat derheqê tundiya li ser jinan, rol û giringiya jinan a di qada fûtbolê de axivî.
‘Dema jin bêdeng dimîne civak jî bêdeng dimîne’
Leyla Firat bi lêv kir ku ew di nav Grûba Dîrenîşê ya alîgirên Amedsporê de cih digire û ji ber vê yekê jî ew serbilind e û got: “Em wek Grûba Dîrenîş, cihê xwe di nav alîgiran de digirin em bi vê serbilid in. Keda jinê, hêza jinê li vê derê jî pirr zêde ye. Ji bo vê jî bi rastî dema ez di nav Dîrenişê de de cihê xwe digirim ez kêfxweş dibim. Dengê jinan tenê li vê derê namîne, li tevahiya cîhanê belav dibe.” Leyla Firat di berdewama axaftina xwe de bal kişand ser têkiliya jinan û civakê û wiha pê de çû: “Cihê ku jin lê bêdeng bimîne civak li wê derê pirr bêdeng dimîne. Ji ber tundiya li ser jinan, ji ber qetilkirina jinan ez wek jinekî bi rastî jî pirr aciz dibim, wekî ku perçeyek ji canê min diçe hîs dikim. Bi rastî jî divê jin hertim serbilind bin û li hember tu tiştî bêdeng nemînin. Dema ku jinek bêdeng ma di tevahî civakê de dê bêdengî çêbibe. Em jin pêwîst e her tim piştevaniya hev du bikin. Qetilkirina jinan gelek zêde bûye, dema ez difikirim ez dibînim ku tirs di nava dilê min de ava bûye. Divê ez tirsa xwe bişkînim heger ez neşkînim bi rastî jî zilam dê barekî giran be li ser pişta min. Dibêjin hêza jinan ya veşartî heye, divê jin hêza xwe derxin holê.”
‘Amedspor tîma gel e’
Leyla Firat bal kişand ser rola jinan a di avakirin û pêşxistina jiyanê û civakê de û got: “Di civaka me de her tişt bi destê jinan tê avakirin. Dema ku jin di cihê xwe de disekine jiyan disekine. Beriya mîladê jinan bi keda xwe di xwezayê de jîyan ava kir. Ew ked; çandina genim, bi wî genimî çêkirina nan û hwd. bû. Lê belê karê zilam her tim neçîrvanî bûye wê demê. Mêze kiriye pêşketina jinan zêde ye û desthilatdariya xwe li ser jinan ava kiriye. Ji wê demê heya îro zilaman, jinan kiriye bindest. Dema ku kesayeta jinan derkeve holê, jin baştir xwe nas dike. Ez wekî jinekî dema xwe azad bibînim, ez ê derdora xwe jî azad bibînim. Koma me Dîrenîş û Amedspor tîma gel e, Amedspor tenê ji mêran pêk nayê.”
‘Bila ew roj tevahî jin li stadê bin’
Leyla Firat da zanîn ku Tîma Jinan a Amedsporê îro bi Tîma Jinan a Trabzonsporê re li Amede dileyîze û got: “Em dixwazin hemû jin li stadê bin. Bi rastî jî ne ji bo tenê em biçin maçê temaşe bikin, em dixwazin dîmeneke xurt derxin holê. Em li benda jinan e.”
