Piştî peyman û agirbesta duh ji hêla Ahmed eş-Şara ve hatî ragihandin çav li rê ye ku îro Fermandarê Giştî yê HSDê Mazlûm Ebdî bi Serokê HTŞê Ahmet eş-Şara re bê cem hev. Tê payîn hurguliyên peyman û agirbestê bên axaftin.
Êrişên çeteyên HTŞ, SMO û DAÎŞê yên bi piştgiriya Tirkiye û Qadarê li hemberî Rêveberiya Xweser a Bakur Rojhilatê Sûriyê û berxwedana HSDê cih bi cih berdewam dike. Ji bo rawestandina êrişan hefteyeke bi navbeynkariya DYAyê hevdîtinên dîplomatîk berdewam dikin û civîn tên lidarxistin. Herî dawî di 17ê Çile de li Fermandarê Giştî yê HSDê Mazûl Ebdî, Serokê Giştî yê PDKê Mesût Barzanî û Nûnerê Taybet ê Trump ji bo Sûriyê Tom Barrack li Hewlerê hatin cem hev.
Ebdî dê hûrguliyan nîqaş bike
Di demek encamên civîna Hewlêrê dihatin meraqkirin de Şara agirbest û peymanek di navbera aliyan de hatiye qebûlkirin ragihand. Di seatên dereng ên şevê de Fermandarê Giştî Ebdî jî daxuyaniyek da çapemeniyê û anî ziman ku bi armanca rawestandina şerek mezin ê navxweyî peyman çêkirine. Ebdî derbirî ku ji bo axaftina hûrguliyan dê di 19ê Çile de biçe Şamê.
‘Hêj gelek xalên ne zelal hene’
Pispor û çavkaniyên herêmî anîn ziman ku ligel daxuyandina agirbest û peymanê jî hêj gelek xalên nediyar û ne zelal hene. Çavkaniyan balkişandin ser êriş û komploya li hemberî Kurdan tên meşandin jî wiha got: “Ligel konsepta navneteweyî jî Rêveberiya Xweser dê destkeftiyan biparêze. Ji bo vê pêwistî bi zelalkirina hûrguliyan û nîqaşan heye. Îro dê ev rewş û nêzîkatiya Şara zelal bibe.”
‘Pêvajoya zehmet a entegrasyonê destpê dike’
Li aliyê din duh Nûnerê Taybet ê Trump ji bo Sûriyê Tom Barrack jî bi daxuyaniyekê peyman wekî pêkhatinek erênî pênasekiri bû. Barrack daxuyandibû ku pêvajoyek zehmet a entegrasyonê dest pê dike û wiha gotibû: “DYA ji bo ev pêvajo bi rihetî bimeşe dê heta dawiyê hewil bide.”
Graham pirs ji Barrack kirin
Senatorê Partiya Komarparêz Lindsey Graham jî li ser hesaba xwe ya fermî peyamek weşand û wiha got: “Derbarê hûrguliyên peymanê de tu agahiyên min û senatorên din tune ye. Ev peyman dema hate çêkirin bi kîjan aliyan re hate şêwirîn. Têkoşîna li dijî DAÎŞê dê çewa bê meşandin. Derbarê peymanê de nêrîna Îsraîlê hate girtin? Gelek xalên ne zelal hene ku divê demildest agahdariya wê bê kirin.
