Stenbol – Rêvebera Komaleya Dema Jinan Derya Aslan diyar kir ku ew ê li dijî tundî, polîtîkayên bişaftinê û kuştina jinan li qadan bin û dengê xwe bilind bikin û 8ê Adarê li qadan daxwaza aştiyê bikin.
Amadekariyên sazî û dezgehên jinan ji bo 8ê Adarê Roja Jinan a Cîhanê bênavber berdewam dikin. Li Stenbolê jî di çarçoveya 8ê Adarê de gelek çalakî û xebat tên lidarxistin. 8ê Adarê dê li Stenbolê jin dakevin qadan û daxwaz û dengê xwe bilind bikin. Komeleya Dema Jinan sala 2020an li Stenbolê hatiye damezrandin û xebatên jinan bi rê ve dibe.
Rêvebara Komaleya Dema Jinan Derya Aslan têkildarî 8ê Adarê nêrînên xwe anî ziman.
‘Jin şer naxwazin û li dijî polîtîkayên şer têdikoşin’
Derya Aslan diyar kir ku îro jin pêşengiyê ji pêvajoyê re dikin û got: “Dema ku li her welatê cîhanê şer hebê yên ku herî zêde bandor dibînin jin û zarok in. Îro pêvajoyekî heye, divê em hê zêdetir bixebitin û xwe bigihînin tevahî jinan. Heke aştî were êdî tu kes jiyana xwe ji dest nadê. Aştî dê bandorê bide her kesî. Jin şer naxwazin û li dijî polîtîkayên şer têdikoşin. Jin li dijî şer çi destê wan bê dikin. Li Rojava şerekî hebû, jin li dijî şerê li vir bertek nîşan dan. Li Rojava jiyanakê hevpar heye, ew êriş jî ji bo destkeftiyên jinan holê rakin pêk hatin. Jin li avahiyan hatin avêtin, keziyên jinan hate jêkirin. Ji bona wan êrişan em daketin qadan. Li ku tundî hebê em ê li qadan in. Jin li herderê cîhanê sînoran rakirin, bertek êrişên li ser Rojava dan. Tevahî jin dengê xwe kirin denge Rojava. Rojava ji bo jinan mînak e. Jin moralê xwe ji Şoreşa Rojava digirin.”
‘Em li vir in, em naçin tu derî’
Derya Aslan da zanîn ku li ser jinan neheqî li ku hebe ew ê li wir têbikoşin û wiha got: “Ji bo tundiya li ser jinan ji holê bê rakirin em dixebitin. Îro em ber bi 8ê Adarê ve diçin. Lê em dizanin ku têkoşîn ne tenê rojekî ye. Îro destkeftiyên jinan ji destê wan tê derxistin. Desthilatdar ji bona wê polîtîkayên taybet derdixe. Em ê bi şîra ‘li dijî tundî, şer û îstismarê li vir in’ qadan bin. Em li vir in, em naçin li tu derî. Bi van gotinan em ê li qadên 8ê Adarê bibin. Di 8ê Adarê de li Kadikoyê mitîng heye. Em ê li vir bin û paşê jî tev li ‘Meşa Şevê’ ya 8ê Adarê bibin. Niha ji bo 8ê Adarê em belavok belav dikin ku jin li qadan dengê xwe bilind bikin.”
‘Em ê li her derî mafê jinan biparêzin’
Derya Aslan destnîşan kir ku bi salan e têkoşîna jinan berdewam dike û wiha axivî: “Jin hêza xwe ji têkoşîna xwe digirin. Ev hêz jî dîroka têkoşîna jinan tê. 8ê Adarê li New Yorkê destpê kir û heta îro didome. Bi pêşniyara Clara Zetkin 8ê Adarê Roja Jinan a Cîhanê hate ragihandin. Ev roj sembola berxwedana tevahî jinên cîhanê ye. Jin li ku bin ji bo mafê xwe berxwe didin. Îro gelek cihan mafê jinan tê binpêkirin. Li Afganîstanê tevahî mafê jinan ji destê wan hat derxistin. Li herderî îro şer heye û mafê jinan tê binpêkirin. Li Tirkiyeyê jî mafê jinan li ser gotina ye. Her roj jin tên kuştin. Em ê li her derî mafê jinan biparêzin û li dijî polîtîkayên baviksalarî têbikoşin.”
‘Em bi reng û xemla xwe li qadan bin’
Derya Aslan got ku jin li 8ê Adarê di serî de daxwaza aştiyê bikin û axaftina xwe wiha bi dawî kir: “Ji bo aştiyekî mayînde em ê qadan bin. Em ê li qadan polîtîkayên desthilatdar ên li dijî jinan dengê xwe bilind bikin. Îro îstismarkirina zarokan zêde bûye. Ji bo parastina zarokan em ê qadan bin. Em dibêjin ku ‘parastina jinan parastina zarokan e.’ Jin li herderî êrişên destkeftiyên xwe dê bibêjin em li vir in. Em ê li herderî bin û mafê xwe biparêzin. Heta îro jin têkoşînekê bêhempa da dê ji niha şun ve jî têbikoşe. Em bi reng û dengê xwe li qadan bin. Em jin li hemberî tundî, polîtîkayên bişaftinê û kuştina jinan qadan bin û dengê xwe bilind bikin.”
