DFG’ê têkildarî êrîşên û girtina xebatkarên kavara mîzahî LeManê de diyar kir ku ew li dijî êrîşan li kêleka LeManê ne û wiha got: “Beriya salvegera 32’emîn a Komkujiya Madimakê êrîşeke bi vî rengî, provaya komkujiyê ye.”
Komeleya Rojnamegerên Dîcle Firatê (DFG) derbarê êrîşa li ser kovara mîzahê LeMan û girtina xebatkarên wê de daxuyanî da. DFGê bi bîr xist ku ji ber ku LeMan karîkaturek xêz kiriye li ser medyaya civakî bûye hedef, piştre jî komeke “paşverû” êrîşî avahiya wê kirin û wiha hat gotin: “Beriya salvegera 32’emîn a Komkujiya Madimakê êrîşeke bi vî rengî, provaya komkujiyê ye.”
DFGêdaxuyand ku diviya bû wezaretên Edaletê û Karên Hundirîn pêşî li êrîşan bigirin, berevajî vê yekê bi lêpirsîn û girtinan bingeha êrîşan amade kirin. Di daxuyaniyê de hat gotin ku ji bilî binçavkirin û girtina xebatkarên LeManê, lêpirsînek darayî jî li dijî kovarê hatiye vekirin.
DFG’ê destnîşan kir ku êrîşên hikûmetê yên li ser azadiya çapemenî û îfadeyê bûne sîstematîk û wiha domand: “Êrîşa li ser LeMan ji têgihîştina dijminane ya li dijî mîzah, azadiya îfadeyê û azadiya çapemeniyê serbixwe nîne. Weke Komeleya Rojnamegerên Dîcle Firatê, em ê li dijî van êrîşan li kêleka LeMan û azadiya îfade û çapemeniyê bisekinin. Em ê li dijî paşverûtiyê têkoşîna hevbeş bimeşînin û civakek çapemeniyek azad û demokratîk ava bikin.”
