Bi hilweşîna rejîma Sûriyeyê re, di êrişên DAIŞê yên li dijî sivîl û leşkeran ên li çolistana Sûriyeyê zêde bûn. Di êrîşên DAIŞê de 70 kes hatin kuştin.
Fermandarê giştî yê Hêzên Sûriyeya Demokratîk (HSD) Mezlûm Ebdî di çend daxuyaniyên xwe yên dawîn de ragihandibû ku zanyariyên wan hene ku çeteyên DAIŞê plan dikin ku êrişî navendên ku DAIŞî û malbatên wan lê girtî ne, bikin. Mazlum Ebdî ji rojnameya The World a Brîtanyayê re axivî û got: “Têkildarî planên DAIŞê yên ji bo êrişên li ser navendên ku endamên DAIŞê û malbatên lê ne, agahiyên îstîxbaratî di destê me de hene.” Mazlum Ebdî piştrast kir ku êrişên dewleta Tirk û çeteyên wê bandorê li ser belavbûna HSDê dikin.
DAIŞê li çolistana Sûrî 70 kes kuştin
Piştî rûxandina rejîma Sûriyeyê di 8ê Kanûnê de, çeteyên DAIŞê li çolistana Sûriyeyê 6 êriş li dijî sivîl û leşkerên rejîma Sûriyeyê ya berê pêk anîn û di encamê de 70 leşker û sivîl kuştin. Di 17ê Kanûnê de şaneyên çeteyên DAIŞê êrişî bendeke kontrolê ya Hêzên Ewlekariya Hundirîn a li Reqayê kirin û 2 endamên wê kuştin, 2 endam û hin sivîl jî birîdar bûn. Li bejahiya başûrê rojhilatê kantona Tebqayê jî êrişî hêzên Ewlekariya Hundirîn û nuqteyên HSDê yên li nêzî Medanê kirin.
Di 16ê Kanûnê de, artêşa Amerîkayê ragihandibû ku hêzên wan ji bo ku DAIŞ nekaribe êrişan bike û li naverasta Sûriyeyê belav bibe, operasyon pêk anîne û 12 DAIŞî kuştine.
Rayedarên Iraqî jî diyar kirin ku agahiyên wan hene dê çeteyên DAIŞê hewl bidin êrişî herêmên Bakur û Rojhilatê Sûriyeyê bikin, bi taybet navendên girtina çeteyan ên li herêmên Rêveberiya Xweser.
Êrîşên Tirkiyeyê hêzê dide DAIŞê
Berpirsên navneteweyî ji ber êrişên DAIŞê dilgiran in, dibêjin ku DAIŞ dê hewl bide sûdê ji valahiya ewlehiyê û tevliheviya li Sûriyeyê wergire û bi hêzeke zêdetir vegere ku ev yek jî ji bo herêmê û cîhanê gefeke mezin e.
DAIŞ sûdê ji êrişên dagirkeriya Tirk û çeteyên wê yên li ser Minbicê û derdora Kobanê, her wiha mijûlbûna Hêzên Sûriyeya Demokratîk, digire û hewl dide vegere qada Sûriyeyê û êrişî herêmên Bakur û Rojhilatê Sûriyeyê dike.
Wezîrê karên derve yê Iraqê Fuad Husên hişyarî da ku çeteyên DAIŞ’ê li Sûriyeyê dest bi xwekomkirinê kiriye, piştî ku çekên ku artêşa rejîma berê ya Sûriyeyê li pey xwe hiştibûn, desteser kirin.
Wezîrê iraqî di dema axaftina bi telefonê ya li gel wezîrê brîtanî yê ji bo Rojhilata Navîn û Bakurê Afrîkayê Hamish Falconer de, ew hişyarî da: “DAIŞ refên xwe ji nû ve birêxistin dike, ji ber ku di encama hilweşîna artêşa Sûriyeyê de dest danîne ser gelek çekan. Vê yekê hişt kontrola xwe li herêmê berfireh bike.”
