Şirnex – Midûra Polîtikayên Jinan ya Şeredariya Cizîrê Nergîs Ant anî ziman ku wan heta niha ji bo jinan projeyên cur bi cur li darxistine û got: “Em di rêveberiya herêmî de vîna jinan esas digirin.”
Şeredariya Cizîrê ya ku 8 salan ji aliyê qeyûm ve hatibû desteserkirin di hilbijartina herêmî ya 31ê Adara 2024an de ket destê Partiya Wekhevî û Demokrasiyê ya Gelan (DEM Partî). Şaredarî nêzî salekê ye ji aliyê DEM Partiyê vê tê rêveberin. Piştî ku hevşeredarên Cizîrê dest bi xebatan kirin, îradeya jinan esas girtin û di wê çerçoveyê de xebatên xwe meşandin. Şaredariya DEM Partiyê saziyên ku ji aliyê qeyûman ve hatinê girtin ji nû ve vekirin û ji bo jinan jî projeyên taybet pêk anîn. Midûra Polîtikayên Jinan ya Şeredariya Cizîrê Nergîs Ant, bi boneya 8ê Adarê Roja Jinên Cihanê xebatên şeredariyê yên ji bo jinan vegot.
Nergîs Ant diyar kir ku wan herî dawî ji bo jinan maxazaya Keziyê ya piştgiriyê vêkiriyê û got: “Me ji bo jinên ku rewşa wan a aborî ne baş e maxazaya Keziyê ya piştgiriyê vekir. Em alîkariyê ji kesên rewşa aboriya wan baş e digirin û didin malbatên ku rewşa wan a aboriyê ne baş. Me di meha Sibatê de dest bi vî karî kir. Me heta niha ji gelek malbatan re alîkarî kir. Xebateke xweş çêbû. Jinên hatin vir jî gelek kêfxweş bûn. Civaka me ji aliyê aboriyê ve gelek zahmetiyan dijîn. Bi vekirina maxazayê pir kêfxweş bûn. Ev proje ewil li Cizîrê ket meriyetê. Armanca me ew e ku em maxazayê dewlementir bikin û behtir alîkariyê belav bikin.”
Projeyên ji bo jinan
Nergîs Ant destnîşan kir ku ji roja şeredarî ketiye destê wan heta niha wan ji bo jinan projeyên cur bi cur amade kirine û wiha axivî: “Piştî Şeredarî ket destê me, me ewil ji bo jinan dest bi xebate kir. Me bi rêya şeredariyê hewl da xwe bigihînin jinan û alîkariya wan bikin. Me ji bo jinên ku zilam tundiyê li wan dikin, xeta agahiyên tundiyê vêkir ku bi rêya wê jin bikaribin xwe bigîhînin me. Jinên ku xwe digîhînin me, em alîkariya wan dikin. Hem ji aliyê hiqûqî û hem jî ji aliyê derûnî ve em hewl didin alîkariya wan bikin. Ku daxwazên wan hebin jî em pêk tînin. Saziyên jinan û baro bî hev re alîkariya wan dikin. Em bernameyên weke, şano, şahî û civînan jî li dar dixînin. Di pêşiya me de projeya me ya navenda piştgiriya jinan jî heye. Em ê di demeke nêzîk de vekin. Bi minesebeta 8ê Adarê jî em ê JinKart derxînin û li hemû jinan belav bikin. Em hewl didin bigihînin 8ê Adarê.”
‘Vîna jinê esas digirin’
Di dawiya axaftina xwe de Nergîs Ant bi lêv kir ku ew berovajî şeredariyên pergalê rêveberiya jinê esas digrin û wiha pê dê çû: “Em di rêveberiya herêmî de vîna jinê esas digrin. Her dû hevşeredarên me jî ji vir in û civakê baş nas dikin. Ji bo pirsgirêka jinan çareser bikin behtir dikevin nav hewldanan. Em weke miduriyeta polîtikayên jinan jî civînan li ser pirsgirêkên jinan li dar dixînin û dikevin nav hewldanan. Daxwazên jinên Botanê jî jinên Botanê dizanin. Ji ber wê jî em bi rihetî bi jinan re dikevin tekiliyê û daxwaz û pirsgirêkên wan guhdar dikin.”
