GABBê piştî komcivîna xwe daxuyanî da çapemeniyê. Hevseroka GABBê Neslîhan Şedal diyar kir ku divê qanûna derheqê qeyûman de bê guhetin û xwest hevşaredarên ji wezîfeyê hatine dûrxistin vegerin ser karê xwe.
Yekitiya Şaredariyên Herêma Anatoliya Başûrê Rojhilat (GABB) li Amedê Komcivîna xwe ya salane li Çand Amedê li dar xist. Hevşaredaran piştî civînê li ber Çand Amedê daxuyanî çapemeniyê.
Hevseroka GABBê Neslîhan Şedal daxuyanî xwend.
‘Pevajo bila bibe sedema aştî û demokrasiyê’
Neslîhan Şêdal diyar kir ku pêvajoya hatiye destpêkirin gelek girîng e û wiha got: “Em dixwazin bibêjin ku me diyalogên ku di siyaseta Tirkiyeyê de dest pê kirin e bi qîmet dîtin. Em hêvî dikin ku ev pêvajoya diyalogê ku hatiye destpêkirin bibe sedema bi dawîkirina şer, pêkanîna aştî û demokrasiyê. Em bi hev re dixwazin ji raya giştî re ragihînin ku em amade ne alîkarê vê pêvajoyê bin. Em bawer dikin ku di vê pêvajoya ku ji bo demokratîkbûna Tirkiyeyê de girîng e, divê hemû alî bi baldarî berpirsyariyên xwe bi cih bînin. Ev hem pêwistiya demokrasiyê ye, hem jî hêviya gelan e. Hêvî û îradeya gelan tê binpêkirin û qeyûman dişînin ser îradeyê. Bi qeyûman îradeya gel paşguh dikin.”
‘Em ê vîna gel xwedî derkevin’
Neslîhan Şedal da zanîn ku divê desthilatdar vîna gel nas bike û wiha axivî: “Astengkirin û tayînkirina qeyûman baweriya civakê ya ji bo hilbijartinê jî kêm dike û baweriya ji demokrasiyê asteng dike. Destwerdana li ser îradeya gel bi rêya kompasên dadwerî tê kirin. Ev yek jî ji bilî têkbirina hêviyên civakê ti encamekê din nade. Tirkiye heke bixwaze bibe welatek demokratîk, divê herî kêm îradeya gel ango biryara ku ji hilbijartinê derketiye, rêzê jê re bigire. Divê mafê hilbijartinê û kesên ray didin were mîsogerkirin. Ev berpirsiyariya desthilatê ya qanûna bingehîn e. Rêzgirtina ji îradeya gel re, şertê bingehîn ê aştî û edaletê ye.”
‘Divê hevşaredar vegerin ser karê xwe’
Neslîhan Şedal diyar kir ku divê hevşaredarên ji wezîfeya xwe hatine dûrxistin dîsa vegerin ser karê xwe û axaftina xwe wiha bi dawî kir: “Em wek Yekîtiya Şaredariyên Herêma Anatoliya Başûrê Rojhilat, daxwaz dikin ku xalên girêdayî Qanûna Şaredariyan a bi hejmara 5393an ku destûrê dide qeyûman were guhertin û heke hevşaredar, şaredar ji wezîfeyê were dûrxistin jî divê cîgirên serokê şaredariyan û ji meclisên şaredariyan kesek were bijartin. Her wiha em daxwaz dikin ku polîtîkaya danîna qeyûman demildest bên rawestandin, rêveberên hilbijartî vegerin ser karên xwe, hevşaredar û endamên meclisên şaredariyan yên girtî werin berdan û demokrasîya herêmî bêtir were xurtkirin.”
