Navenda Nûçeyan – Rojnameger Gelawêj Ewrîn têkildarî xwepêşandanên li Rojhilatê Kurdistanê û Îranê axivî diyar kir ku jin, ciwan û tevahiya gelên Îranê ji bo bidestxistina azadiya xwe amade ne canê xwe jî feda bikin û got: “Bê tirs û du dilî berê xwe didin kolanan. Ji bo wê jî sala 2026an dê bibe sala mîsogeriya azadiya gelên Îranê.”
Xwepêşandanên ku li Çarşiya Tehranê ya Îranê ji ber krîza aborî dest pê kirin û li bajarên din ên Îranê û Rojhilatê Kurdistanê belav bûn, 12 roj in didomin. Di van xwepêşandanan de ku veguherî xwepêşandanên li dijî polîtîkayên tepeserkirinê yên rejîmê, bi dehan kes ji aliyê hêzên rejîmê ve hatin kuştin û bi sedan kes jî hatin birîndarkirin û binçavkirin. Berxwedana gelên Îranê bênavber didome. Rojnameger Gelawêj Ewrîn têkildarî xwepêşandanên li Rojhilatê Kurdistanê û Îranê ji ajansa me re axivî.
Gelawêj Ewrîn da zanîn ku serhildan li seranserî Îran û Rojhilatê belav bûne û wiha got: “Bi giştî 33 welatî ji aliyê rejîma Îranê ve hatine qetilkirin ku piraniya wan ji Rojhilatê Kurdistanê bi taybet bajarê Îlamê ne. Bi dehan kes birîndar in û bi hezaran kes hatine girtin. Çarenûsa gelek girtiyan ne diyare. Hêzên dewletê êrişî du nexweşxaneyên Avdanan a Îlamê û nexweşxaneya Sîna ya Tehranê kirin. Bi darê zorê hinek birîndar bi xwe re birin. Ev êrişa hovane rastî berteka gel hat û gel li ber xwe da.”
‘Gel heta serê sibê li kolanên xwe nobetê digire’
Gelawêj Ewrîn bi bîr xist ku navenda serhildanên “Jin jiyan azadiyê” bi taybet Îlam û Kirmanşah bûn û wiha berdewam kir: “Di roja 10emîn a xwepêşandanan de xelkê bajarokên Avdanan û Melekşahî ku bi rojan di nava berxwedaniyê de bûn, li beramberî êrişên dewleta Îranê mafê xwe yê parastinê bikar anîn. Êrişên rejîmê bi berxwedaniyek mezin şikandin. Hêzên rejîmê neçar man xwe ji gelek taxan bi paş ve bikişînin. Di halê hazir de hêzên dewletê nikarin bikevin ti taxeke bajarên Avdanan û Melekşahî. Rejîm car bi car bi êrişên cuda dixwaze vê berxwedaniyê bişkîne û komkujiyan bike. Gelek ji hêzên ewlekariyê jî di nava qereqol û saziyên dewletê de ji tirsa dernakevin û ketine pozisyona parastinê. Bi taybet bi destpêkirina şevê re hêzên rejîmê dixwaze hêza gel bişkîne lê heta niha nekariye. Ne tenê li van her du bajarokan li navenda Îlamê jî berxwedaniyek mezin heye û gel heta serê sibê mirov dikare bêje li kolanên xwe nobetê digirin.”
Li gelek bajarên Rojhilat û Îranê berxwedan berdewam dikin
Gelawêj Ewrîn da zanîn ku gel hewl dide bi rêbazên cuda kolanên xwe biparêze û wiha domand: “Hêzên rejîmê di rewşa heyî de xwe bi paş ve kişandine. Amadekariyên ji bo êrişan hene. Li bajarên din ên Îlamê jî berxwedana gel heye û berdewam dike. Li gelek bajarên Îranê jî rewşek wiha heye ku derengiya şevê êdî kolan di destê xelkê de ye. Gelek baregehên leşkerî, qereqol û avahiyên walitiyan li piraniya bajaran tên şewitandin. Heta serê sibê li kolanên Îlam, Kirmaşan, Tehran, Şîraz, Meşhed û gelek bajarên din di navbera hêzên dewlet û xelkê de şer diqewime. Her şev jî bajarên nû li ser zêde dibin. Jixwe di dîmenan de jî xûya dikin ku piranî di wexta şevê de gel li kolanan li ber xwe didin. Li gor agahiyên çavkaniyên me yên ji Rojhilatê Kurdistanê ev du roj in li ser Îlam û Kirmaşanê her wiha sînorê di navbera Başûr û Rojhilatê Kurdistanê de tevgerek hewayî ya kobra û skorskiyan jî heye. Ev tevgera hewayî ya dewleta Îranê dibe ji bo tirsandinê xelkê jî be. Lê ber bi Kurdistanê ve sewqiyateke leşkerî ya zêde jî heye. Egera anîna hinek hêzên girêdayî Îranê ji Iraqê jî wek agahiyekê heye lê hêj nehatiye piştrastkirin. Xetereya êriş û komkujiyan bi taybet ji bo Rojhilatê Kurdistanê heye.”
‘Bazarî û xwendekarên zanîngehan di şoreşan de her tim bi rola pêşeng rabûne’
Ewrîn Gelawêj anî ziman ku nêzîkatiya Komara Îslamî ya Îranê ya li dijî xelkê Belûcan weke gelê Kurd e û wiha got: “Xelkê Belûc jî her tim weke Kurdistanê bi liv û tevgereke biçûk hema tê tepeserkirin. Dewlet bi hincetên cûr bi cûr her tim dixwaze Belûcistanê milîtarîze bike û gelek caran xelkê Belûc bi komkujiyan re derbas bûne. Niha dîsa rewşa Belûcistanê aloz e. Gelek birîndar û girtî hene. Wek bajarên din ên berxwedêr rewşa awarte li Belûcistanê jî hatiye ragihandin. Ji ber sînorê Belûcistanê bi Pakistanê re heye û her tim bi behaneyên ku tevgera Cundul-Îslam li ser wan sînoran heye, xelkê sivîl rast e rast dibin hedefa hêzên Îranê. Jixwe dema xwepêşandanan di 28ê Kanûnê de dest pê kirin, bi nerazîbûna bazarî û esnafên bajarê Tehranê dest pê kir. Jinan, ciwanan û tevahiya Tehranê bazarî bi tenê nehiştin. Li Tehranê bazarî û xwendevanên zanîngehan di şoreşan de her tim rola pêşeng lîstine. Niha jî heman rol dane ser milê xwe û her şev çalakiyên li paytext Tehranê berfirehtir, dewlemendtir û bi girseyîtir dibe.”
Gelawêj Ewrîn bi lêv kir ku jin çalakî û xwepêşandanan weke berdewama şoreşa ‘Jin Jiyan Azadî’ dibînin û careke din pêşengtiyê dikin û wiha got: “Yên ku herî zêde niha li kolanan pêşengiya şerê kolanan bi rejîmê re dikin dîsa jin in. Jin rengê çalakiyan jî diguherînin. Tevlîbûna jinan dibe sedem ku tevahiya civakê li pey wan bimeşin û bi bajar yan jî beşek civakê re sînordar nemîne.”
‘Helwesta partiyên Kurd dê bandoreke erênî li serhildanan bike’
Gelawêj Ewrîn peymana ku 7 partiyên Kurd ên Rojhilat di nava xwe de çêkirin bi bîr xist û wiha dirêjî da axaftina xwe: “Partiyên siyasî li Rojhilatê Kurdistanê di demek wiha de xwedî helwesteke erênî û hevbeş in. Her wiha ji bo îro roja pêncşemê jî bangawazî hat kirin ku gel li tevahiya Îran û Rojhilatê Kurdistanê greva giştî bikin. Çav li rê ye ku bi taybet li bajarên Kurdistanê greva giştî dest pê bike. Lê rewş êdî tenê bi grevan re jî sînordar nemaye. Her kêlî guhertin çêdibin û helwesta gel radîkaltir jî dibe. Ango ji grevan wêdetir êdî gel kolanên xwe bi cih nahêlin û dixwazin hêzên rejîmê ji bajarên xwe derxînin. Çalakî jî piranî bi vê mebestê pêk tên. Armanc jî ew e ku çalakî tenê di çend bajaran de bi sînor nemîne û her kes xwedî li hevdû derbikevin, ji bo wê jî yekbûna helwesta partiyan wê bandoreke erênî li ser rêveçûna serhildanan bike.”
‘Ji bo bidestxistina azadiya xwe amade ne canê xwe jî feda bikin’
Gelawêj Ewrîn di dawiya axaftina xwe de wiha got: “Dirûşmeyên serhildanan nîşan dide ku gel êdî rejîma heyî naxwaze. Di hemû dirûşmeyan de peyva Azadî herî zêde tê bihîstin. Ev yek nîşan dide ku jin, ciwan û tevahiya gelên Îranî çiqas têhniyê azadiyê ne. Ji bo bidestxistina azadiya xwe amade ne canê xwe jî feda bikin. Bê tirs û du dilî berê xwe didin kolanan. Ji bo wê jî mîsogere ku wê sala 2026an bibe sala azadiya gelên îranî ji zilm û zordariyê. Buhara 2026an buhara pêkhatina hêviyên gelên îranî ye û ya em dibînin meşa bi lez û bi israr a ber bi wê ve ye.”
