Stenbol – Sîdar û Zana Uslu ên piştî sala 2021an bi koçkirina Stenbolê re dest bi dirûtina cil û bergên Kurdî kirine diyar kirin ku ew çiqas ji Kurdistanê dûr bin jî li Stenbolê bi çanda xwe re dijîn û wiha gotin: “Newroz cejna Kurdistanê ye. Ji bona wê divê tevahiya gelê Kurd bi cil û bergên xwe ve tevlî Newrozê bibe. Gelê Kurd bi cil û bergên xwe ve tê naskirin.”
Li navçeya Esenyurtê ya Stenbolê bi hezaran Kurd dijîn. Ji wan gelek kes jî bi sedema zextên Tirkiyeyê ji bajarên Kurdistanê koçî Stenbolê kirine. Sîdar û Zana Uslu jî berî 4 salan li Wanê zewicîn û koçî Stenbolê kirin. Li Stenbolê dest bi karê dirûtina cil û bergên Kurdî kirin û ji xwe re dikanekê dirûnkariyê vekirin. Di dikanê de cil û bergên Kurdî didûrin û difiroşin.
Sîdar û Zana Uslu di pêvajoya Newrozê de derbarê eleqeya cil û bergên Kurdî de axivîn.
‘Cil û bergên Kurdî esaleta me ye’
Sîdar Uslu diyar kir ku ew ji berê ve karê dirûnkariyê dike, 4 sal berê ji xwe re dikana dirûnkariyê vekirine û wiha axivî: “Em çiqas ji Kurdistanê dûr ji bin jî, çanda xwe li Stenbolê dijîn. Newroz nêzik e ji bona wê karê me jî zêde bûye. Herkes ji xwe re curbicur cil û bergên Kurdî dikire. Her sal berî Newrozê karê me zêde dibe. Cil û bergên Kurdî esaleta me ye. Gelê Kurd bi cil û bergên xwe tê naskirin. Ji bona wê gel herdem dixwaze cil û bergên Kurdî li xwe bike. Em hêvîdar in ku Newroza îsal jî dê bi coş were pîrozkirin.”
‘Newroz cejna Kurdistanê ye’
Zana Uslu da zanîn ku ew bi hatine Stenbolê ji çanda xwe dûr neketine û ev tişt gotin: “Em jî, gel jî ji cil û bergên Kurdî gelek hez dikin. Newroz ji bo gelê Kurd gelek girîng e. Kurdên ku ji Kurdistanê koçî Stenbolê kirine girêdayî çanda xwe ne. Her Newroz gel tê li vir ji xwe re cil û bergên Kurdî dikirîn û didin dirûtin. Niha jî çend roj ji Newrozê re mane. Gel ji xwe re cil û bergên Kurdî dikirîn. Em jî yek bi yek cilan li vir didûrin. Newroz cejna Kurdistanê ye. Ji bona wê divê tevahiya gelê me bi cil û bergên xwe tevlî Newrozê bibe.”
