Gelê Wargeha Mexmûrê li dijî rêgirî, ambargo û nûnerên xwe yên ku ji aliyê hêzên Iraqê ve hatine girtin, meşekî girseyî lidarxistin û peyama “Heta ku em mafên xwe bidestnexin, em dest ji vê rêya xwe ya pîroz bernadin” hat dayîn.
Ji 10ê Nîsanê ve ambargoyek girankirî ji aliyê dewleta Iraqê ve li ser Wargeha Mexmûrê tê meşandin. Her wiha ji bo çareserkirina van pirsgirêkan û rakirina ambargoya heyî şandeyek ji nûnerên wargehê pêk tê, berê xwe dan Bexdayê. Piştî ku hevdîtin bi Wezîrê Dadê re pêk anî, di vegerê de ango di 14ê gulanê de ji aliyê hêzên Iraqê ve hatin girtin. Ji wê rojê heta niha ne ambargoya heyî hat rakirin, ne pirsgirêkên heyî hatin çareserkirin û ne jî endamên şandeya wargehê hatine berdan.
Gelê Mexmûrê têkildarî ambargo, rêgirî û neberdana nûnerên wargehê yên ji aliyê Iraqê ve, xelkê Wargeha Şehîd Rûstem Cûdî (Mexmûr) li ber avahiya Saziya Malbatên Şehîdan kom bûn û heta ber avahiya Neteweyên Yekbûyî (NY) meşiyan.
Di meşê de alên ku posterên Rêber Gelê Kurd Abdullah Ocalan û wêneyên endamên şandeyê Ehmed Şehbaz, Bêwar Emîn û Edban Yilmaz hatin rakirin. Bênvber dirûşmeyên “Bijî berxwedan Mexmûrê” û “Bijî Serok Apo” hatin berzkirin. Piştî ku meş li ber avahiya Nûnertiya NY’ê ya WargehaMexmûrê rawestiya, daxuyaniyek ji aliyê Hevseroka Dîwana Meclisa Gel a Wargeha Mexmûrê Nûdem Yaman ve hat dayîn.
Beriya ku daxuyanî were dayîn, ji bo tevahî şehîdên Tevgera Azadiya Kurdistanê deqeyek rêz hat gitin. Piştî rêzgirtinê Hevseroka Dîwana Meclisa Gel a Wargeha Mexmûrê Nûdem Yaman daxuyaniyek da.
Nûdem di destpêka axaftina xwe de xelkê wargehê di vê rêwîtiya penaberiyê de gelek zorî, zehmetî û êşên giran kişandine û wiha got: “Ev xelkê Wargeha Mexmûrê xwe muhtacê tu kesê nekir. Ji ber wê berê xwe dan bajarên Iraqê û ji bo debara jiyana xwe, kar dikirin. Dewleta Iraqê bi hevkariya dewleta tirk a ku yekem armana wan belavkirina wargehê ye, ambargoyek ji 10 ê Nîsanê ve daniye ser wargehê. Ji roja ku ev ambargo tê pêkanîn heta niha, berxwedana xelkê wargehê hîn zêdetir dibe. Dixwazin bi dîlgirtinê îradeya vî gelî bişkînin. Wek gelê wargehê, wê her tim xeta berxwedanê, xeta Apoyî ji bo me armanc be. Heta ku em mafên xwe bidestnexin, em dest ji vê rêya xwe ya pîroz bernadin.”
Piştî axaftinê meş bi dirûşmeyên “Bijî Serok Apo” û “Bijî berxwedana Mexmûrê” bi dawî bû.
