Hevseroka DBPê ya Wanê Gonul Uzunay têkildarî mîtînga ku di 23ê Tebaxê de li Wanê pêk bê, diyar kir ku li 13 navçeyan û navenda Wanê bi tevlêbûna hemû rêveber û hilbijêran seferberî dane destpêkirin û got: “Gelê Wanê gelekî serhildêr e. Em bawer dikin ku dê ev mîtîng mohra xwe li dîrokê bixe.”
Di çarçoveya Pêvajoya Aştî û Civaka Demokratîk de dê di 23ê Tebaxê de li Parka Musa Anter a li Wanê mitîngekeke mezin bê lidarxistin. Mitîng dê bi dirûşma “Ne tecrîd lê azadî bi ser bikeve” bê lidarxistin. Mitîng dê bi pêşengiya DBP, TJA û DEM Partiyê de bê li darxistin.
Li hemû Tirkiyeyê maf tên binpêkirin
Têkildarî armanca mîtingê û amadekariyên mêtîngê Hevseroka Rêxistina DBPê ya Wanê Gonul Uzunay nirwandin kir. Gonul Uzunay ewil li ser armanca mîtîngê rawestiya û wiha got: “Di 27ê Sibatê de Rêberê Gelê Kurd Abdullah Ocalan banga Aştî û Civaka Demokratîk kir. Li ser banga Birêz Abdullah Ocalan pêvajoyek pêş ket. Ji bo ev pêvajo serkeftî pêş bikeve em jî wekî rêxistina DBPê di nava xebatan de ne. Ji bo em piştgiriyê bidin vê pêvajoyê em ê di 23ê tebaxê de mîtîngê pêk bînin. Ji ber ku pirsgirêka Kurd nayê çareserkirin, bi xwe re pirsgirêkên din jî pêş dixe. Ji bo wê mafê gelê Kurd tê binpêkirin. Li hemû erdnîgariya Tirkiyeyê mafên mirovan tên binpêkirin. Ji ber vê yekê ev pêvajoya hem ji bo gelê Kurd, hem ji bo gelê Tirk û hemû pêkhateyên Tirkiyeyê pir pir girîng e. Ev mîtîng dê mîtînga herî bi coş, girseyî û heybet be. Di vê pêvajoyê de ji bo çareseriyê rol û rist dikeve ser milê hemû kesan. Hemû kes xwedî rol û rist e.”
Her roj jin tên kuştin
Gonul Uzunay, da zanîn ku bi sedan sal in ji ber ku pirsgirêka Kurd nayê çareserkirin her ku diçe bandoreke neyînî li siberoja Tirkiyeyê dike û wiha axivî: “Ji ber hişmendiya nijadperest ev pirsgirêk kûr dibe. Hemû alî winda dikin. Li Tirkiye û Kurdistanê ji ber demokrasî, edalet û wekhevî tune ye, ev pirsgirêk nayê çareserkirin. Ji ber neçareseriyê îro tu kes nikare bibêje ez di ewlehiyê de dijîn. Em dibînin ku her roj jin têne kuştin. Her roj xweza wêran dibe. Li Şirnexê her roj daristan tên talankirin. Pirsgirêkên jin û ciwanan her ku diçe kûr dibe. Ev banga Rêzdar Abdullah Ocalan êdî çareseriyê li me ferz dike. Îro li cîhanê şerê sêyemîn heye. Em dibînin ku pergala Netew Dewletê ne çareserî ye. Li şûna wê çareserî Civaka Demokratîk û aştiya bi rûmet e. Ji ber vê yekê ev banga Rêzdar Abdullah Ocalan gelek girîng û jiyanî ye. Ev paradîgmaya Birêz Ocalan di vê pêvajoyê de bêtir gîrîng e. Li dijî pergala netew dewlet û şerê sêyemîn ê cîhanê û li dijî neçareseriya pirsgirêka Kurd em vê mîtîngê pêk tînin.”
Mîtînga herî xwedî wate ye
Gonul Uzunay, da zanîn ku di serdema dawî de mîtînga herî xwedî wate û girîng mîtînga ku di 23ê Tebaxê de li Wanê pêk bînin e û wiha berdewam kir: “Em ê vê mîtîngê bi daxwaza aştiya bi rûmet û civaka demokratîk bêk bînin. Em ê di 23ê Tebaxê li Parka Mûsa Anter mîtînga mezin pêk bînin.”
Li 13 navçeyan seferberî îlan kirine
Gonul Uzunay, bal kişand ser amadekariyên mîtîngê û wiha pêde çû: “Me Komîteya Amadekar a mîtîngê ava kir. Me bi deklerasyonekê bi raya giştî re parve kir. Me li 13 navçeyên Wanê ji bo beşdariya mîtîngê seferberî îlan kiriye. Beriya wê jî piştî banga Birêz Ocalan a 27ê sibatê em di nava xebatan de bûn. Me civîn pêk dianîn. Me gelek civînên xweser pêk anîn. Di van civînên dawî de em hem banga tevlêbûna mîtîngê dikin û hem jî em qala girîngiya pêvajoyê dikin. Em li hemû navçeyan pêşenên civakê, esnafan, saziyan û nûnerên partiyan re hevdîtinan dikin. Di vê xebata mîtîngê de nûnerên saziyan, hevserokên partiyên me, kesên hatine hilbijartin hemû beşdarî xebatên vê mîtîngê dibin. Li 13 navçeyan xebat heye. Hem esnafan ziyaret dikin û hem jî civînan pêk tînin. Em dîsa bi rêya çapemeniyê de bang dikin. Em ê heta 23ê tebaxê xebatên xwe yên ji bo mîtîngê berdewam bikin.”
Dê peyamên aştî û civaka demokratîk bidin
Gonul Uzunay, li ser bernameya mîtîngê jî rawestiya û ev agahî dan: “Mîtîng dê ji bo Aştî û Civaka Demokratîk bê li darxistin. Dê bi dirûşma “Tecrîd na, divê azadî pêk bê” were li dar xistin. Ji bo aştî, demokrasî û mafê mirovan pêş bikeve em bang dikin. Dê di mîtîngê de peyamên ji bo çareseriya demokratîk û parastina mafên mirovan a gerdûnî peyam bên dayîn. Em ê saet di 17.00ê 23ê Tebaxê de li Parka Musa Anter kom bibin. Dê hevserokê Giştî yê DEM Partiyê Tuncer Bakirhan, Aktîvîsta TJAyê Gultan Kişanak û Hevserokê DBPê Keskîn Bayindir axaftinan bikin. Dîsa dê hunermend Xecê û Aydin Demîrkaya jî derkevin ser dikê û stranan bibêjin.”
Gelê Wanê gelekî têkoşer e
Gonul Uzunay, da zanîn ku gelê Wanê gelekî têkoşer e û wiha bi dawî kir: “Di salên dawî de vê têkoşîna xwe nîşan da. Li dijî binpêkirina vîna gelê Kurd û vîna gelê wanê serî rakir û destnîşan kir ku dikare bi yekîtî û serhildanê dikare encamê bigire. Destnîşan kir ku dema gel li mafê xwe xwedî derkeve dikare mafê xwe yê hiqûqî û zagonî bi dest bixe. Gelê Wanê gelekî têkoşer e. Em bawer dikin ku gelê wanê dê bi ruhê Newrozê, bi ruhê 8ê Adarê û bi ruhê paradigmaya Aştî û Civaka Demokratîk li mîtîngê xwedî derkevin. Ji bo mafê ziman, çand, nasname, demokrasî û aştiya mayinde em bang li hemû jin, ciwan û pêkhateyên bajêr dikin ku beşdarî mîtîngê bibin.”
