Erzirom – Girtiyê siyasî Ramazan Kaya ku li Girtîgeha Hejmara 2’yan a Ewlekariya Bilind a Dûmlûyê tê ragirtin, bi telefonê bi malbata xwe re axivî û wiha got: “Rêveberiyê zindan kiriye îşkencexane. Ji vê saetê û şûnde li girtigehê çi bê serê kijan hevalê me were rêveberiya girtigehê berpirsyar e.”
Li girtîgehên Tirkiyeyê û bakurê Kurdistanê binpêkirinên mafan her ku diçe zêdetir dibin. Girtiyê siyasî Ramazan Kaya yê li Girtîgeha Hejmara 2’yan a bi Ewlekariya Bilind a Dûmlû ya Erziromê tê ragirtin di 25ê Kanûnê de li ser telefonê bi bavê xwe Samet Kaya re hevdîtin kir û têkildarî binpêkirinên li girtîgehê axivî.
Mafê tedawiyê yê girtiyên nexweş tê astengkirin
Ramazan Kaya, da zanîn ku girtîgeh roj bi roj bêhtir vediguhere îşkencexaneyê û pêdiviyên wan ên sereke yên weke av, xwarin û ceyran jî li dijî wan weke amûrên îşkenceyê tên bikaranîn û wiha got: “Duh heta nîvro av nedan. Dema me sedema wê jê pirsî jî bi keniyan û heqaret kirin. Hinek gardiyan bi taybet hatine hilbijartin. Ev kes bi dijminane nêzî me dibin. Dema bi ser qawîşan de digirin, gardiyan êrişî her kesî dikin û heqaretan dikin. Midûrê girtîgehê jî hewl dide girtiyên siyasî proveqe bike û neçarî întîharê bike. Her wiha, ji bo çareserkirina pirsgirêka av û ceyranê em pê li bişkoka agahdarkirinê kir û alîkarî xwest. Lê dengê bişkokê qut kirine û nahêlin em alîkariyê bigirin. Mafê tedawiyê yê girtiyên nexweş tê astengkirin. Her ku diçe rewşa wan xerabtir dibe. Rêveberiya girtîgehê vê bi zanebûn dike.”
Ramazan Kaya di berdewama axaftina xwe de zanîn ku piştî cezayê hucre û hevdîtinê cezayê pereyan li wan hatiye birîn û mafê wan ê derketina hewşê ya du saetan jî bi awayekî keyfî hatiye bisînorkirin.
‘Piştî axaftina bi telefonê nizanim dê çi bi serê min were’
Ramazan Kaya, destnîşan kir ku rêveberiya girtîgehê ji wan re dibêje; “Em kengî bixwazin hûn ê wê demê avê vexwin, xwarinê bixwin û televîzyonê temeşa bikin.”Kaya, herî dawî ev agahî da: “Piştî axaftina bi telefonê nizanim dê çi bi serê min were. Ji vê saetê şunde li girtigehê çi werê serê kijan hevalê me û dema ku min telefon girt ku gardiyanek êrişê min û hevalên me bike rêveberiya girtîgehê berpirsiyare. Rêveberiyê zindan kiriye îşkencexane. Polîtîkayên li vê derê, girêdayî polîtîkayên li Îmraliyê ne. Li vir nahêlin em bêhn bistînin. Lewma jî banga hestiyariyê li rêxistinên civaka sivîl û raya giştî dikim. Em bêxwedî nînin, em banga hestiyariyê li gelê xwe û tevahiya raya giştî dikin.”
Girtî Kamûran Daşdemîr jî ku di sala 2022yan de li Çiyayê Tendûrekê hatiye girtin û niha li Girtîgeha Hejmara 2yan a Ewlekariya Bilind a Dûmlû ya Erziromê tê ragirtin. Kamûran Daşdemîr bi telefonê bi malbata xwe re axivî û behsa binpêkirinên li girtîgehê kir. Girtî Kamûran Daşdemîr, bang li çapemenî, saziyên mafên mirovan û dezgehên demokratîk kir û got ku li girtîgehê di vê pêvajoya dawî de zext gelek zêde bûne. Kamûran Daşdemîr da zanîn ku gelek caran bi ser qawişên wan de digirin û av û ceyranan qût dikin.
‘Girtiyan ji hev qût dikin’
Kamûran Daşdemîr, di hevdîtinê de wiha got: “Di vê pêvajoya dawî de hertim li ser qawîşan de digirin û mafên herî bingehîn jî bin pê dikin. Av û ceyranê qût dikin, mafê ragihandin, telefon û hevdîtinan asteng dikin. Herî dawî televîzyona wan hatiye desteserkirin, tim qawişên girtiyan tên guhertin û girtiyan dikin hucreyan de. Zextên xwe zêde dikin, lewma dixwazin girtiyan ji hev qût bikin. Banga me ji komele û saziyên mafên mirovan ew e ku van zext û binpêkirina mafan bînin rojevê.”
Bang li saziyan kir
Rûmet Dûrsûn ku ji malbata Kamûran Daşdemîr e, anî ziman ku di van rojên dawî de zextên li Girtîgeha Dûmlûyê zêde bûye û da zanîn ku ne tenê girtiyên wan, hemû girtiyên li wir tên ragirtin rastiyê van zextan tên. Rûmet Dûrsûn, bang li saziyên mafên mirovan kir û got ku ew dixwazin dengê girtiyên xwe bi saziyên demokratîk re bidin bihîstin.
