Şirnex – Girtiya nexweş Semîre Aksû ku 20 sal in girtî ye, tevî ku bi nexweşiya penceşêrê ketiye jî, wê sewqî nexweşxaneyê nakin.
Semîre Aksû di 19 Çileya 2005an de li Edeneyê hatiye girtin. Heya niha li gelek girtîgehan ma. Ji sala 2020 ve li Girtîgeha Tîpa T a Şirnex de dimîne. Beriya 3 salan dema Semîra Aksû çû nexweşxaneyê hînbû ku bi nexweşiya penceşêrê ketiye. Semîra Aksû ji bo bê dermankirin serî li rêveberiya girtîgehê da. Lê heya niha ji ber kêmaniyên bijîşkan û destûrnedayîna çûyîna nexweşxaneyê bi awayek rêk û pêk nayê tedawîkirin.
Rêveberê Şaxa Komeleya Mafên Mirovan (ÎHD) a Şirnex Parêzer Mesût Şen di 27ê tebaxê de bi Semîra Aksû re hevdîtin pêk anî û derbarê rewşa wê de agahî dan ajansa me. Prz. Mesût Şen anî ziman ku Semîre Aksû ji bo pirsgirêkên xwe yên tenduristiyê serî li ÎHDê daye û got: “Piştî serlêdanê min çû pêre hevdîtin kir.
Xwîn ji laşê Semîra Aksû diçû
Mesût Şen diyar kir ku di hevdîtinê de Semîra Aksû jêre gotiye gelek nexweşiyên wê hene û wiha berdewam kir: “Dema min hevdîtên pêre kir, Semîra Aksû ji min re got, ‘gelek nexweşiyên min hene. Lê ya pir min aciz dike nexweşiya penceşêrê ye. Du caran ji bo penceşêra roviyan mînaka xwîna min girtin. Pozîtîf derketin. Lê cara dawîn negatif derket. Ez ji ber nexweşiyê bêzar im.’ Heya niha derbarê nexweşiyên Semira Aksû de tu rapor radestî wê nehatine kirin. Ji ber vê yekê pirsgirêk derdikevin.”
Rêveberiya girtîgehê bersiv neda
Mesût Şen bal kişand ser rewşa Semîra Aksû got: “Dema em di hevdîtinê de bûn, ji min re got, ‘Niha jî xwîn ji bedena min tê.’ Bi rastî ev rewşeke gelek xerab e. Zêdeyî 2 mehan e rêveberiya girtîgeha Şirnexê bersiv nade serlêdanên Semîra Aksû yên ji bo nexweşxaneyê.”
Em ê ji bo Semîra Aksû serî li saziyên fermî bidin
Mesût Şen herî dawî da zanîn ku weke komeleye ew ê li ser rewşa Semîra Aksû û pirsgirêkên wê serî li saziyên fermî bidin û got: “Bi rastî Semîra Aksû ji me xwest ew jêre bibin alîkar ku biçe nexweşxaneyê. Weke komeleyê em ê serî li saziyên fermî bidin ku Semîra bê dermankirin.”
Hêjayî gotinêye ku hevjînê Semîre Aksû, Abdûlkerîm Aksû jî 20 sal in di zindanê de ye û niha di Girtîgeha Tîta T a Tarsûsê de dimîne.
