Amed – Hevberdevka Înîsiyatîfa Yekitiya Demokratîk Gulcan Kaçmaz Sayyîgît ku tev li Konferansa Parlamenterên Jin ên Kurd bû hewceye ku li ser yekitiya gelê Kurd xebatên xurt bên meşandin û got: “Divê îro jin pêşengtiya azadî, aştî, civaka demokratîk û yekitiya gelê Kurd bikin.”
Konferansa Parlamenterên Jin ên Kurd di pêşengtiya Tevgera Jinên Azad (TJA) de di 28-29ê Gulanê de bi dirûşma “Jin siyaseta demokratîk dimeşînin, civaka demokratîk avadikin” li Çand Amedê (Navenda Kongre û Çandê ya Şaredariya Bajarê Mezin a Amedê) ya li navçeya Yenîşehîr a Amedê hate lidarxistin. Aktîvîstên TJAyê, gelek jinên niha parlamaneter in û yên berê parlamenter bûn ji çar aliyên Kurdistanê û Ewropayê tev li konferansê bûn. Parlamenter û siyasetmedarên li Rojava, Şengal û Ewropayê bi awayekî online tev li konferansê bûn. Konferans bi aşkerekirina encamnameyê bi dawî bû.
Hevberdevka Înîsiyatîfa Yekitiya Demokratîk Gulcan Kaçmaz Sayyîgît têkildarî konferansa jinan, di avakirina civaka demokratîk de rol û mîsyona jinan û yekitiya netewî ya kurd axivî.
‘Divê li ser yekitiya gelê Kurd xebatên xurt bên meşandin’
Gulcan Kaçmaz Sayyîgît bal kişand ser geşedanên li Rojhilata Navîn û wiha got: “Li Rojhilata Navîn tiştên nû diqewimin. Divê di vir de gelê Kurd jî cihê xwe bigire. Pirsgirêka gelê Kurd a herî mezin çi ye? Em nikarin bibin yek û xebatên xwe bimeşînin. Sed sal in xebat tên meşandin lê encameke berbiçav derneketiye holê. Her tim netewdewletan jî ev yek asteng kirin. Dema em li Kurdistanê dinêrin. Em ewilî parçe kirin. Li ser îmha, înkar û asîmîlasyonê siyasetek meşandin û nehêlan em bên cemhev û yekitiya xwe ava bikin. Vê demê hewceye ku li ser yekitiya gelê Kurd xebatên xurt bên meşandin.”
‘Divê jin pêşengtiya azadî, aştî û civaka demokratîk bikin’
Gulcan Kaçmaz Sayyîgît qala banga Rêberê Gelê Kurd Abdullah Ocalan kir û wiha domand: “Dema birêz Ocalan qala banga ‘Aştî û Civaka Demokratîk’ kir. Hem li Tirkiyeyê û Bakur hem aliyên din ên Kurdistanê û Rojhilata Navîn dengekî erênî derket holê. Rihê vê demê barekê deyne ser milê me. Ew bar herî zêde jî li ser pişta jinan e, li ser pişta jinên Kurd e. Ji bo ku bi polîtîkayên îmha, înkar, asîmîlasyonê yên sedan sal in tên meşandin zêdetir jinan êş kişandin. Jin her tim daxwaza azadî û aştiyê dikin. Îro jî divê jin pêşengtiya azadî, aştî û civaka demokratîk bikin û her wiha pêşengtiya yekitiya gelê Kurd jî bikin.”
‘Jin dê xebatên yekitiyê xurttir bimeşînin’
Gulcan Kaçmaz Sayyîgît bi lêv kir ku ji bo yekitiya gelê Kurd bê avakirin xebatên xwe li her derê dimeşînin û wiha dirêjî da axaftina xwe: “Em Konferansa Jinên Kurd ên Parlamenter li dar dixin. Em di konferansê de dibêjin jin dê siyaseta demokratîk bimeşînin û civaka demokratîk ava bikin. Bi salan e li ser jinên Kurd şerekî taybet hatiye meşandin. Ji ber wê her tim jinên Kurd dibêjin ‘Em ê bi felsefeya jin jiyan azadî’ xebatan bimeşînin. Îro saya vê berxwedanê em hem li parlamentoyê cih digirin, hem hevserokatiyê dikin hem li her qada jiyanê jin xwe bi cih dikin. Jinên siyasetmedar îro jî dibêjin em ê ji bo civaka demokratîk, ji bo azadiya gelê Kurd û ji bo yekitiya gelê Kurd em ê çawa xebatê bimeşînin, dê di konferansa me de nexşerêyeke zelal derkeve holê. Li ser vê nexşerêyê jî jin dê pêşengtiya yekitiyê bikin û xebatên yekitiyê xurttir bimeşînin.”
‘Em dikarin yekitiya gelê Kurd ava bikin’
Gulcan Kaçmaz Sayyîgît di berdewama axaftina xwe de ev tişt gotin: “Piştî banga birêz Abdullah Ocalan divê em xebatên xwe hinekê leztir bimeşînin. Divê em di nava gel de vê belav bikin. Civaka demokratîk çi ye divê çawa were avakirin? Ji ber vê yekê divê jinên kurd pêşengtiya vê yekê bikin. Divê em li dijî şerê taybet jî xebatan bimeşînin. Yekitî zêdetir ji bo jinên kurd hewce ye. Ji ber em dizanin ku dema jinên kurd yekitiya xwe xurt bikin ava bikin em xwediyê wê felsefeyê ne ku yekitiya gelê Kurd jî yekitiya gelê Kurdistanê jî bi hev re ava bikin.”
‘Divê her Kurdek berpirsyartiyê bigire û xebatên xwe bimeşîne’
Gulcan Kaçmaz Sayyîgît bi lêv kir ku ji bo yekitiyê li her çar aliyê Kurdistanê xebat tên meşandin û axaftina xwe wiha bi dawî kir: “Li Qamişloyê konferansek çêbû û em jî li wir bûn. Hişmendiya me çi bibe bila bibe. Em endamên kîjan partiya siyasî bin bila bibin. Berî her tiştî em kurd in. Ji ber wê yekê divê em hizbên xwe partiyên xwe deynin aliyekê ji bo yekitiya gelê Kurd bi hev re xebatê bimeşînin. Li Konferansa Qamişloyê jî ev yek derket holê. Ji ber vê yekê konferanseke pir taybet bû. Belê em li Bakur jî vê xebatê dimeşînin me Înîsiyatîfa xwe ya Yekitiya Demokratîk jî ava kir. Bi raya giştî re jî parve kir. Divê gelê Kurd di vê sedsalê de navê xwe bi tîpên zêrîn binivîsin. Em nikarin sedsaleke din winda bikin. Sed sal in em tune tên hesibandin lê belê têkoşîneke me ya pir mezin jî heye. Sed sal in me bedelên herî giran daye ku îro em dikarin van xebatan bimeşînin. Li ser wê têkoşîn û berxwedanê berfirehtir em ê xebatên xwe bimeşînin. Dema em yekitiya gelê Kurd ava bikin. An jî em li bakurê Kurdistanê em yekitiya gelê Kurd û Kurdistanê ava bikin. Dê teqez bandora wê li ser her sê beşên din ên Kurdistanê jî çêbibe. Ji ber vê yekê bangawaziya me li gelê Kurd ew e ku her kurd berpirsyartiyê bigire û xebatên xwe bimeşîne.
