Hevberdevka HDKê û parlementera DEM Partiyê ya Erziromê Meral Daniş Beştaş, di bernameya bîranînê ya Sirri Surreya Onder de axivî û got: “Nabe ku bi Colanî re biaxivin û bi Mazlûm Abdî re neaxivin. Pêwîst e bi Mazlûm Abdî re jî bê axaftin.”
Meclîsa Kongreya Demokratîk a Gelan (HDK) a Îzmîrê li Navenda Çandê ya Narlidereyê bernameya “Bîranîna Sirri Sureyya Onder, aştî û hevdîtina bi ciwanan re” li dar xist. Tevî keça Sirri Sureya Onder Ceren Onder Kandemîr, pêkhateyên HDKê, Endezyarên û Avahîsazên azadîxwaz, Platforma Plansaziya Bajêr, Komeleya Ji Bo Azadiyê (OHD) ya Şaxa Îzmîrê û gelek rêxistinên sivîl tevlî bîranînê bûn. Eywana ku bername lê hatî pêşkêşkirin, pankarta kampanyaya “Ji bo aştiyê milyonek îmze” û pankarta Barikat Egeyê ku li ser “Em sond dixwin birayê Sirri, wê aştî were vî welatî” dinivîse hat daliqandin. Li eywanê dirûşmeyên “Şehîd namirin” û “Bijî Serok Apo” olan dan. Bername piştî temaşekirina sînevîzyona ku ji bo Sirri Sureya Onder hatî amadekirin dest pê kir.
Destpêkê endamê meclîsa ciwan a HDKê Garip Sazci avivî û got: “Onder, bi berxwedêriya xwe bû pêşengeke enternasyonalîzmê û tim rê li ber xwişk-biratiya gelan vekir.” Di bernameyê de rojnameger û aktivîstê ekolojiyê Hakan Tosun ê ku 10ê Cotmeha 2025an li Esenyurta Stenbolê bi êrîşekê hatî kuştin jî hate bibîranîn. Xwişka wî Ozlem Tosun derbarê kuştina wî de axivî û got: “55 roj in hê îdîaname jî nehatiye amadekirin. Kujer sê kes bûn lê tenê du kes heta niha hatine girtin. Heta bûyera hatî serê birayê min bi temamî neyê zelalkirin, em ê dev ji doza xwe bernedin.”
Dûre Ceren Onder Kandemîr axivî û got: “Li vê derê em wekî rikdarên vî welatî civiyan e û heta li vî welatî aştî pêk neyê em ê ti carî dev ji rika xwe bernedin.”
Herî dawî Meral Daniş Beştaş axivî ev tişt anî ziman: “Tekoşîna Sirri Sureya Onder wê tim rê nîşanî me bide. W tim ji bo hewl da, ji ber ku aştî ne bi diayan û hêviyan bi bedêl û tekoşînê pêk tê. Em di proseyeke krîtîk de ne, aştî ji xwe ve pêk nayê. Aştî şêweyeke jiyanê ye, wisa tenê bi peymanan pêk nayê. Lewma divê her kes fikra aştiyê di navenda jiyana xwe de bi cîh bike. “
“Em ne ji desthilatdariyê, ji xwe û Brêz Ocalan bawer in.”
Meral Daniş Beştaş got gelek kes ji me pirs dikin dibêjin: “Hûn çawa ji vê desthilatdariyê bawer dikin” û wiha lê zêde kir: “Em ne ji deshilatdariyê bawer in. Em ji Birêz Ocalan û ji xwe bawer in. Lewma jî ji bo pêkanîna aştiyê pêwîst e, deriyên girtîgeha Îmraliyê bên vekirin.”
‘Pêwîst e bi Mazlûm Abdî re jî bê axaftin’
Meral Daniş Beştaş bal kişand ser rewşa Suriyeyê û behsa nakokiya desthilatdariya Tirkiyeyê kir û got: “Nabe ku em li Pirsûsê behsa aştiyê bikin lê li Kobanê şer bikin. Ji bo pêkanîna aştiyê divê li hemû herêmê siyaseteke aştiyane bê meşandin. Nabe ku bi Colanî re biaxivin û bi Mazlûm Abdî re neaxivin. Pêwîst e bi Mazlûm Abdî re jî bê axaftin.”
Di merasîma bîranînê de herî dawî stranbêj Mercan Argunaxa derket ser dikê û çend stran gotin.
