Serokê Giştî yê EMEPê Seyît Aslan piştî hevdîtina bi DEM Partiyê re axivî û got ku divê tecrîda li Îmraliyê bê rakirin û desthilat gavan biavêje.
Hevserokên Giştî yên Partiya Wekhevî û Demokrasiyê ya Gelan (DEM Partî) Tulay Hatîmogûllari û Tuncer Bakirhan ku di Şandeya Îmraliyê de cih digirtin, bi rêveberên Partiya Kedê (EMEP) re li Meclisê hevdîtin krin. Di hevdîtinê de li ser banga “Aştî û Civaka Demokratîk” a Rêberê Gelê Kurd Abdullah Ocalan nirxandin hatin kirin. Piştî hevdîtinê, daxuyanî hate dayîn.
‘Gavên demokratîk hewce ne’
Serokê Giştî yê EMEPê Seyît Aslan di daxuyaniyê de wiha got: “Têkildarî pêvajoyê agahiyên dawî hatin parvekirin û me fikrên xwe bi hev re parve kirin. Em dixwazin bibêjin ku banga ji Îmraliyê hatî, bêdengkirina çekan, nîqaşkirina pirsgirêka Kurd a li ser platformên demokratîk û aştiyane, ji bo demokratîkbûnê gelek girîng in.”
Aslan anî ziman ku serkeftina pêvajoyê dê ji hêla aborî û siyasî ve jî bi xwe re encamên erênî bîne û wiha domand: “Lewma em ji bo pêvajo bi demokratîkbûnê biencam bibe û pirsgirêka Kurd li ser bingeheke aştiyane û mafên wekhev were çareserkirin, me nêrînên xwe parve kirin. Partiya me ji berê heta niha her tim ev tişt got; ji bo pirsgirêka Kurd ji dorpêça şer were derxistin û pevçûn bi dawî bibin, di mijara avakirina zemîneke demokratîk de divê îktîdar jî gavan biavêje, dewlet jî gavan biavêje. Rakirina tecrîda li Îmraliyê, cîbicîkirina efûya siyasî, bidawîkirina polîtîkaya qeyûman, bidawîkirina zextên li ser saziyên demokratîk, rawestandina operasyonên derveyî sînor û vegera hevşaredaran a li peywira xwe, dê ji bo demokratîkbûna Tirkiyeyê girîng bin.”
Aslan anî ziman ku divê her kes erk û berpirsyartiyên dikevin ser milê xwe tavilê bicih bînin û wiha pê de çû: “Ji bo ku temamiya van pêvajoyan li ser zemîneke bêhtir demokratîk bên nîqaşkirin, divê her kesê erk û berpirsyartiyên xwe tavilê bicih bînin. Nayê qebûlkirin ku ev bang bê vehêlandin. Ji bo me mijara esasî ew e ku ev pêvajo bi rê û rêbazên aştiyane, mercên wekhev û demokratîk bên çareserkirin.”
Aslan bal kişand ser êrişên li Sûriyeyê li dijî Elewiyan jî tên kirin û got: “Em bûn şahidên komkujiyên hêzên HTŞê yên li dijî Elewiyan. Em careke din bang dikin ku van pevçûnan û komkujiyên li dijî Elewiyan bi dawî bikin.”
‘Bang ji bo 85 milyon kes hatiye kirin’
Hevserokê Giştî yê DEM Partiyê Tuncer Bakirhan jî diyar kir ku Abdullah Ocalan ji bo pirsgirêk bi rêyên muzakere û diyalogê bên çareserkirin metna bangawaziyê nivîsandiye û wiha got: “Serkeftina pêvajoyê, bi beşdariya çalak a tevahiya dînamîkên birêxistinkirî yên civakê, muxaleeta civakî û siyasî dibe. Di hevdîtina me ya bi EMEP’ê re de wan jî gotin ku ew girîngiyê didin Banga Aştî û Civaka Demokratîk û ji bo ev pêvajo veguhere pêvajoya aştiyê dê tişta ji dest tê bikin. Ev yek biqder û qîmet e.”
Bakirhan wiha domand: “Ev bang ne tenê ji bo Kurdan û DEM Partiyê hatiye kirin. Ji bo 85 milyon welatiyên Tirkiyeyê, hêzên demokrasiyê, jinan, ciwan û me tevan hatiye krin. Têkoşîna Tirkiyeyeke demokratîk a bêşer û bêpevçûn ku kesek lê jiyana xwe ji dest nadin, bi vê bangê dest pê kiriye. Ev bang, start e. Ji bo ev bang bigihije cihê xwe, hewcehî bi yekitiya hêzê heye.”
Şande piştre çû serdana Navenda Giştî ya CHPê.
