Hevpeymaniya Hêzên Siyasî yên Rojhilatê Kurdistanê ragihand ku kîmyabarana Helebceyê nekariye îrade û berxwedana Kurdan têk bibe û têkoşîna rewa ya neteweya Kurd dê heta serkeftinê berdewam bike.
Hevpeymaniya Hêzên Siyasî yên Rojhilatê Kurdistanê bi boneya 38emîn salvegera kîmyabarana Helebceyê ya ji aliyê rejîma Baas ya Iraqê ve ku di encamê de zêdetirî 5 hezar Kurdan jiyana xwe ji dest da, bi hezaran birîndar bûn û bi deh hezaran koçber bûn, daxuyaniyek weşand.
Daxuyaniya Hevpeymaniya Hêzên Siyasî yên Rojhilatê Kurdistanê wiha ye;
“Armanca dijminên me ya tunekirina netewa me dê tu carî pêk neyê!
Komelên gelê têkoşerê Kurdistanê!
Desthilatdaran û rejîmên dagirker yên Kurdistanê her tim ji xwe re kirine armanc ku netewa Kurd tune bikin û ji bo vê armanca xwe, serî li her cûre jenosîd, koçberkirina bi darê zorê û Enfalê dane. Lêbelê, ev hemû sûc, tevî kîmyabarana Helepceya Başûrê Kurdistanê, nekarîn îradeya têkoşîn û berxwedana Kurdan têk bibin. Ev sûc û trajediyên niha delîlên rewabûna têkoşîna nasnameya Kurd li hemû beşên Kurdistanê ne.
38 sal berê, di 16ê Adara 1988an de, rejîma berê ya Iraqê bênavber bombeyên kîmyayî avêtin ser bajarê Helebceyê û sûcekî li dijî mirovahiyê kir. Zêdetirî 5 hezar mêr, jin û zarokên Kurd şehîd bûn û bi hezaran kes jî birîndar bûn. Kîmyabarana Helebceyê, di wê demê de karesateke mezin a mirovî û jenosîdeke kêmdîtî bû. Lêbelê, ji ber bazarên siyasî, bazirganî yên hêzên cîhanê û nebûna piştgiriya gelê Kurd ê bindest, ev sûcê mirovahî û şer hate veşartin. Yên ku ev sûc kirine, li tu dadgeheke navnetewî nehatin darizandin û hesap ji wan nehat xwestin. Lêbelê, Kurdên Rojhilatê Kurdistanê di vê trajediya dîrokî de roleke girîng leyîstin.
Berî kîmyabarana Helebçe ya Başûrê Kurdistanê, rejîma berê ya Iraqê bajarên Serdeşt, Şîno û Zerdeyê yên li Rojhilatê Kurdistanê jî hedef girt. Di dema kîmyabarana Helebceyê de, pêşmergeyên Komele li nêzîkî herêmê bicih bûbûn, ji ber jehra kîmyayî bandor bûn. Tevî gelek hewldanên ji bo revîna ji vê rewşê, dema ku ji Çemê Sîrwan derbas dibûn, rastî kemîna hêzên Komara Îslamî hatin û şerekî giran kirin. Di encamê de, 72 pêşmergeyên Komeleyê di sengerên şer de jiyana xwe ji dest dan, hejmarek ji wan birîndar bûn, piştî îşkenceyên giran dîl hatin girtin û hatin darvekirin.
Di heman demê de, li herêma Şarezûr a Hewramanê, di şerekî di navbera hêzên rejîmê û Pêşmergeyên Partiya Demokrat de, mixabin hejmarek ji Pêşmergeyan şehîd bûn. Mixabin, di kîmyabarana Helebceyê de bi dehan endamên Partiya Demokrat a Kurdistanê a Îranê şehîd bûn. Gelek endamên din yên partiyê li herêma di bin kontrola Komara Îslamî de hatin girtin û hejmarek ji wan li Girtîgeha Dîzilawa ya Kirmaşanê hatin darvekirin.
Di salvegera 38emîn a kîmyabarana Helebceyê de, em şehîdên vê karesatê, hemû şehîdên têkoşîna rizgariya netewa Kurd, bi taybetî şehîdên nû yên gelê me yên ku ji ber êrişên Komara Îslamî şehîd bûn, bi rêzdarî bibîr tînin. Her wiha em radigihînin ku têkoşîna rewa ya netewa me dê heta serkeftinê bidome.”
