Di encama êrîşên hêzên Îranê yê li ser sînorê Newsudê de kolberek hat kuştin.
Li gorî nûçeya Kolbernewsê, danê siharê kolberek Kurd yê bi navê Mihemed Rehîmî yê xelkê Banewre ya bajarokê Pawe ya girêdayî parêzgeha Kirmşan ya Rojhilatê Kurdistanê, li sînorê Newsud di encama êrîşa hêzên Îranê de jiyana xwe ji dest daye.
Çavkaniyê ragihand ku Mihemed Rehîmî bavê zarokekî/ê bû. Hêjayî gotinê ye di sala 2024an de li Rojhilatê Kurdistanê 52 kolberên Kurd hatin kuştin û 131 jî birîndar bûn.
Di 2024an de
Li gorî Ajansa Kolbarê di sala 2024an de li ser sînorên Azerbaycan, Kurdistan û Kirmanşahê di encama êrîşên leşkeran û qezayê xwezayê de bi giştî 345 kolberan jiyana xwe ji dest dan û 286 kes jî birîndar bûne.
Rêxistina Mafan: Îranê di 2024an de 63 kolber kuştin
Li gorî Rêxistina Mafê Mirovan a Kurdistanê leşkerên rejîma Îranê di 2024an de 63 kolberên Kurd kuştin û 233 kolberên Kurd jî di gulebaran û êrişa raste rast de birîndar kirin. Hate destnîşankirin ku ji ber astengî û rêgiriyên rejîma Îranê ya li pêşiya rêxistin û çalakvanên mafê mirovan di şopandin û lêkolînkirina binpêkirinên li Rojhilatê Kurdistanê, bîlançoya pêwîst nehatiye komkirin.
TMMK: Rejîma Îranê di 2024an de 51 kolber kuştin
Tora Mafê Mirovan a Kurdistanê di rapora 2024an de destnîşan kiribû ku Rejîma Îranê di 2024an de li herêmên sînor ên parêzgeha Urmiye, Bane, Serdeşt, Pawe û Kirmanşan 51 kolberên kurd kuştin û 246 kolber jî birîndar kirine.
Kolbarnewsê: Di 13 salan de 681 kalber kuştin
Di sala 2012an de 43 kolber mirin, 51 kolber birîndar bûn. Di sala 2013an de 43 kolber mirin, 31 kolber birîndar bûn. Di sala 2014an de 44 kolber mirin û 58 kolber birîndar bûn. Di sala 2015an de 38 kolber hatin kuştin û 51 kolber jî birîndar bûn. Di sala 2016an de 29 kolber hatin kuştin û 29 kolber birîndar bûn. Di sala 2017an de 66 kolber hatin kuştin û 88 kolber birîndar bûn. Di sala 2018an de 58 kolber hatin kuştin û 152 kolber birîndar bûn. Di sala 2019an de 86 kolber hatin kuştin û 170 kolber birîndar bûn. Di sala 2020î de 67 kolber kolber hatin kuştin û 174 kolber jî birîndar bûn. Di sala 2021an de 75 kolber hatin kuştin û 153 kolber jî birîndar bûn. Di 2022an de 49 kolber hatin kuştin û 176 kolber jî birîndar bûn. Di sala 2023an de 39 kolber hatin kuştin û 195 kolber jî birîndar bûn. Di sala 2024an de 44 kolber hatin kuştin û 400 kolber jî birîndar bûn.
