Hizba Zehmetkêşên Kurdistanê piştgiriya xwe ji bo projeya yekîtiya neteweyî re ragihand û got, “Em girîngî û helwesta xemxwer ya nivîskar, rewşenbîr, akademîsyen û çalakvanên civaka sivîl teqdîr dikin.”
Hizba Zehmetkêşên Kurdistanê bi daxuyaniyekê piştgiriya xwe ji bo projeya bi dirûşmeya ‘Yeke yeke yeke, gelê Kurd yeke’ ku projeyek netewî ji bo yekitiya gelê Kurd bi îmzeya zêdetirî 200 kesayetên cuda yên Başûrê Kurdistanê hate destpêkirin, ragihand û got, “Bûyeran piştrast kir ku tevî taybetmendiyên xwezayî yên têkoşînê li hinek beşên Kurdistanê, lêbelê pirsgirêka Kurd di eslê xwe de yeke.”
Daxuyaniya Hizba Zehmetkêşên Kurdistanê wiha ye;
“Hizba Zehmetkêşên Kurdistanê piştgiriyê dide projeya yekîtî û yekdengiya netewî da ku navendên biryardanê yên li cîhanê bihejîne. Ji ber ku herêm di rewşek şer û guhertinê re derbas dibe. Vê rewşê rasterast û nerasterast bandor li rewşa li Kurdistanê kiriye. Ji bo çareserkirina pirsgirêk, encamên şer, serdema piştî şer û pêşketinên siyasî yên li herêmê; çêkirina siyasetek hevbeş ya Kurdî karekî netewî yê niha ye. Bûyeran piştrast kirin ku tevî taybetmendiyên xwezayî yên têkoşînê li hinek beşên Kurdistanê jî, lêbelê pirsgirêka Kurd di eslê xwe de yeke. Di vê çarçoveyê de;
1-Ji ber hevhelwestî û berpirsyartiya me ya neteweyî, em piştgiriyê didin banga ‘Yeke Netewe, Yek Çarenûs; Projeya Lihevhatina Neteweyî dê Navendên Biryardanê yên Cîhanê Bihejîne’. Em girîngî û helwesta xemxwer ya nivîskar, rewşenbîr, akademîsyen û çalakvanên civaka sivîl teqdîr dikin. Em hêvî dikin ku ev têkoşîna berhemdar berdewam bike û bibe bingehek xurt ji bo hevkariya netewî.
2-Di heman demê de, em weke Hizba Zehmetkêşên Kurdistanê, di vê kêliya dîrokî ya nazik û hesas de bang li partiyên siyasî yên Kurdistanê dikin ku berjewendiya netewî ya bilind divê di navenda xebata siyasî ya hevbeş de be, berjewendiya giştî divê li ser berjewendiyên taybet û partiyan pêş bikeve û dawî li belavbûnên siyasî bîne.”
