HSDê daxuyand ku hêzên hikûmeta demkî bi tank û topan êrîşî taxên Şêxmeqsûd û Eşrefiyê dikin. HSDê îdiayên saziyên ewlehî û leşkerî yên hikûmeta demkî ku taxên Helebê ji aliyê QSDˊê ve hatin topbarankirin derewandin.
Navenda Ragihandina Hêzên Sûriya Demokratîk (HSD) bi daxuyaniyekê îdiayên saziyên yên hikûmeta demkî yên der barê hedefgirtina taxên Helebê ji aliyê hêzên HSDê ve ku vê dawiyê, li gorî peymana 1ˊê Nîsanê, nuqteyên xwe radestî Hêzên Ewlekariya Hundirîn-Asayîşê kirin, derewandin.
Di daxuyaniyê de wiha hat gotin: “Lêpirsîna rast û berpirsiyarî dikeve ser milê komên parçebûyî yên girêdayî hikumeta Şamê ku ji 4 mehan ve krîzan çêdikin. Ew kom bi rêya dorpêça taxên Şêxmeqsûd û Eşrefiyê, dubarebûna tehrîqkirin û êrîşên li dijî sivîlan li pêş çavên saziyên hikûmetê, li gel hebûna peymana 1ˊê Nîsanê, krîzan çêdikin.
Êrîşa îro ya li ser taxên niştecihan encama çalakiya wan komên bi xwe ye, bi taybet li rojava û bakurê Helebê. Moşek û top ji nuqteyên wan koman ber bi taxên Helebê ve tên avêtin ku tevliheviya ewlehî çêkin û fitneyan derxin.
Êrişên van koman gihîşt heta tank û topavêjan li dijî taxên Şêxmeqsûd û Eşrefiyê bi kar bînin, ev yek rageşiyeke xeternak e ku gefan li jiyana şêniyan û aramiya herêmê dixwe.”
