Hêzên Sûriya Demokratîk (HSD) ragihand ku çeteyên HTŞê 6 caran agirbesta ku duh hatiye ragihandin binpê kiriye, û bang li civaka navneteweyî kir ku berpirsiyariyên xwe bicîh bîne.
Navenda Çapemeniyê ya HSD’ê ragihand ku komên girêdayî HTŞ’ê çawa agirbest li herêmên Cîzîr û Kobanî yên Rojava binpê kirine. Di daxuyaniyê de hate destnîşankirin ku tevî ku peymana agirbestê ketiye meriyetê jî, komên girêdayî Şamê êrîşên xwe yên li ser herêmên Cîzîr û Kobanî berdewam kirine û tekez kir ku ev yek binpêkirinek eşkere ya şertên peymanê ye.
Daxuyaniya HSDê ku binpêkirinên agirbestê, saet bi saet rêzkirî, bi hûrgilî nîşan dide, wiha ye: “Agirbest duh di saet 8:00’an de ket meriyetê. Lêbelê, tevî vê yekê, komên ku behsa wan tê kirin piştî wê demê rêzek êrîş pêk anîn, wekî ku li jêr hatine rêzkirin:
* Duh di saet 8.10’an de:
Komên girêdayî Şamê bi topên giran bajarokê Zirgan ê li bakurê Hesekê bombebaran kirin. Bombebaran zêdetirî saetekê dom kir.
* Duh di saet 8.20’an de:
Komên girêdayî Şamê bi çekên giran êrîşî gundê Til Barûd kirin, ku li ser rêya Abyad, li başûrê Hesekê ye.”
* Îro saet 11.30ê sibê:
Komên girêdayî Şamê li dora bajarê Şîrîn êrîşî hêzên me kirin. Hêzên me êrîş paşve xistin.
* Îro saet 11.45ê sibê:
Karwanek ji komên girêdayî Şamê li gundê Baselê, li başûrê Hesekê, li ser rêya ber bi Ebyadê ve êrîşî hêzên me kir.
* Îro saet 14.10ê piştî nîvro:
Komên girêdayî Şamê li dora bajarê Sirînê, li başûrê Kobaniyê, êrîşek duyemîn li dijî hêzên me kirin. Hêzên me êrîş bi serkeftî paşve xistin.
* Îro saet 14.45:
Komên girêdayî Şamê gundê Hemdûn ê li başûrê Kobaniyê bi çekên giran bombebaran kirin. Di êrîşê de jinek hat qetilkirin.
Banga parastina sivîlan
HSDê di daxuyaniya xwe de ev bang jî kir: “Em pabendbûna xwe ya bi peymana agirbestê û dûrketina ji zêdebûna aloziyan ji nû ve piştrast dikin. Em bang li aliyên garantor û civaka navneteweyî dikin ku berpirsiyariyên xwe bicîh bînin û van binpêkirinan bi awayekî ku parastina sivîlan û parastina aramiya herêmê misoger bike, bişopînin.”
