Rojnameya Yedîoth Ahronoth di nûçeyek weşandî de diyar kir ku li gorî çavkaniyên parastinê Îsraîl ji bo operasyonek li dijî Libnanê li benda bersiva Trump e. Heman çavkaniyan ji rojnameyê re got ku serdana Netanyahu ya ji bo Washingtonê dê li ser vê biryarê diyarker be.
Rojnameya Yedîoth Ahronot a ku li Îsraîlê weşanê dike, nûçeyek derbarê amadekariyên operasyona Îsraîlê ya li dijî Libnanê weşand. Di nûçeyê de hate diyarkirin ku Hikûmeta Îsraîlê dixwaze operasyonê li dijî Hizbûllaha Libnanê bide destpêkirin lê li benda bersiva Serokê DYAyê Trump e. Di nûçeyê de ji wezîfedarên ewlehiyê ev agahî hatin ragihandin: “Rayedarên parastinê yên Îsraîlê bêyî destûra DYAyê naxwazin operasyonê pêk bînin. Amedekariyên operasyonê hatine kirin û planên pêwist temam bûne. Yekîneyên îstîxbaratê qada Libnanê dişopînin. Serokwezîr Netanyahû di 29ê Kanûnê de diçe Washingtonê û dê ev serdana wî di warê bersiva Trump de diyarker be.”
Di nûçeyê de hate destnîşankirin ku hemû hebûnên Hizbûllahê yên nepenî, guherînên siyasî yên li vî welatî û fînansmanê ji Îranê tê, di bin venêrandinê de ne. Di nûçeyê de van agahiyan cih girt: “Lê li gorî tespîtan tûnelên li derdora Beyrûdê qasî yên li Gazeyê zêde û kûr nînin. Her wiha Fermandarê Leşkerî yê Hizbûllahê Heysem Alî Tabatabaî hate kuştin bes Hizbûllahê bersiv neda. Ev yek jî nîşan dide ku niha siyasetek dengeyî difikire. Lê ku şer destpê bike dê bi awayek topyekûn tevbigerin.”
‘Îsraîl li benda bersivek berfireh e’
Di nûçeyê de hate daxuyandin ku Îsraîl li bendê de Hizbûllah di şerde bersivek berfireh bide û bi awayek koordîneyê êrîşan pêk bîne. Nûçe wiha berdewam dike: “Hêzên Hizbûllahê ji artêşa Libnanê bi hêztir e. Ji bo wê ne hêz û ne jî niyeta artêşa Libnanê heye ku Hizbûllahê bêçek bike. Çek danîna Hizbûllahê jî bi dildarî nabe. Artêşa Libnanê jî wekî bêalî dixuye. Ji bo vê jî artêşa Îsraîlê neçare bi Hizbûllahê re têbikoşe.
