Nûnerên saziyên civakî û partiyên siyasî li Dêrsimê girtina Hevşaredara Dêrsimê Bîrsen Orhan şermezar kirin. Li Miksê jî endam û rêveberên DEM Partiyê tayînkirina qeyûm şermezar kirin.
Dêrsim
Komek nûnerên saziyên civakî girtina Hevşaredara Dêrsimê Bîrsen Orhan şermezar kirin. Parêzer Kenan Çetîn di çalakiya şermezarkirinê de got: “Di dîroka darazê de gavek nû tê avêtin. Kesa di hepsa malê de bû binçav kirin û şandin girtîgehê. Bîrsen Orhan ji ber li dijî barîyeran derket hat girtin.”
Dadgeha Dêrsimê di hefteyekê de, der barê Hevşaredara Dêrsimê Birsen Orhan de du biryarên cuda dan. Ewil biryara girtîgeha malê da. Piştre îro dîsa binçavkirin û vê carê biryara girtinê da û şandin girtîgehê. Dadgehê bi vê helwesta xwe mohra xwe li dîroka darazê xist. Komek nûnerên saziyên civakî û rêxistinên demokratîk û partiyên siyasî li Kolana Hunerê girtina Bîrsen Orhan şermezar kirin. Komê di çalakiyê de pankarta “Em li vîna xwe xwedî derdikevin, binçavkirin, girtin û zext me têk nabe” vekirin. Komê bê navber dirûşmeyên “Dê qeyûm biçe em ê li vir bin” û “zext me bêzar nakin” berz kirin.
Di çalakiyê de Parlamentera DEM Partiyê Ayten Kordu, anî ziman ku bi qeyûman darbeyê li vîna gel dixin û got: “Li vî welatî daraz li gorî vîna siyasî ya AKP-MHPê tev digere. Hûn nikarin têkoşîna me ya azadî û wekheviyê têk bibin. Em ê bêtir xwe bi rêxistin bikin û em ê têkoşina xwe mezintir bikin.”
Di çalakiyê de Parêzer Kenan Çetin jî bertek nîşanî biryara darazê da û wiha got: “Ji ber Birsen Orhan, barîkatên polîsan şermezar kir hat girtin. Em disa di dîroka darazê de rastî gavek nû tên. Kesek di hepsa malê de bû girtin. kesek li mala xwe girtî çawa fikara ku bireve heye. Em ji kesên ku biryaran didin re dibêjin ‘Hiqûq ji bo her kesî lazim e’ û divê li gorî wê biryarê bidin.”
Miks
Li navçeya Miksê ya Wanê jî welatî û rêveberên DEM Partiyê kom bûn û tayînkirina qeyûm şermezar kirin. Komek welatî û rêveberên DEM Partiyê li Miksê ligel sermaya zêde li pêş avahiya Şaredariyê kom bûn û dest bi çalakiya nobetê kirin. Komê di çalakiyê de bênavber dirûşmeyên “Dê qeyûm biçe gel dê bê” û “Bijî berxwedana gelê Kurd” berz kirin. Hevşaredarê navçeya Tatosê ya Erziromê Abdurrahman Sever û parlamenterê DEM Partiyê Yilmaz Hun beşdarî çalakiye bûn û diyar kirin ku dixwazin vîna gel têxin kontrola xwe û dê gelê kurd vê yekê qebûl neke.
Koma welatiyan piştî axaftinan bi dirûşmeya “Bila diz bicehime” berz kirin û heta avahiya DEM Partiyê ya Miksê meşiyan.
