Ji bo damezrîner û pêşengên PKKê Alî Haydar Kaytan û Riza Altun li taxa Tûzlûçayirê şîn hate danîn.
Partiya Karkerên Kurdistan (PKK), duh encama kongreya xwe ya 12emîn eşkere kiribû û ragihandibû ku xwe fesix kiriye. Her wiha di kongrê de şehadeta damezrîner û pêşengên PKKê Alî Haydar Kaytan û Riza Altun jî hatibû ragihandin. Kongre diyarî wan hatiye kirin. Piştî eşkerekirina şehadeta Alî Haydar Kaytan û Riza Altûn li gelek bajarên bakurê Kurdistanê û Tirkiyeyê ji bo rojan şîn wê bên danîn. Yek jî ji cihê şîn lê hat danîn taxa Riza Altun ku lê mezin bûye, li taxa Tûzlûçayira navçeya Mamakê ya Enqerê ye.
Malbatan li cihê ku şîn hate danîn wêneyên Alî Haydar Kaytan û Riza Altun daliqandin û danîn ser maseyê. Li dora wêneyan qerenfîl hatin danîn û find hatin pêxistin. Li vir li sînevîzyona ku qala jiyan û têkoşîna Alî Haydar Kaytan û Riza Altun dike wê bê temaşekirin. Şîn wê 3 rojan bidome. Şîn wê ji aliyê malbata Riza Altun ve bê danîn û birêvebirin.
Derheqê Taxa Tûzlûçayirê de
Taxa Tûzlûçayirê hem ji bo Tevgera Azadiyê ya Kurd û hem jî ji bo tevgerên çepgir ên Tirkiyeyê cihekî girîng e. Pirraniya şêniyên vê taxê civaka Elewî ne. Welatiyên Elewî ku di salên 1960an de ji bajarên cihê hatine li vir bicih bûn e, wan taxê ava kiriye. Li taxê her kes karker û xebatkar e. Rêberê Gelê Kurd Abdullah Ocalan dema li Enqerê dixwîne, ew pirr diçe taxê û li wir mirovan nas dike. Civînên yekem ên berhevkirina komê li vir dar dixe û nîqaşên li ser damezrandina partiyeke li vir bi rê ve dibe.
