Hevseroka Giştî ya DBPê Çîgdem Kiliçgun Uçar li Wanê axivî û diyar kir ku banga Abdullah Ocalan ji bo herkesî ye û got: “Bêyî karkeran, civaka demokratîk nayê avakirin. Ji bo welatekî demokratîk bê avakirin divê em deng û tekoşîna xwe bikin yek.”
1ê Gulanê li Wanê bi pêşengtiya KESK, DÎSK, Odeya Bijîşkan a Wan-Colemêrgê, Şaxa Odeya Bijîşkên Diranan a Wanê û ÎKK a TMMOBê ve hat pîrozkirin. Bi hezaran kedkar, di saetên serê sibehê de bi dirûşma “Em ê bi ser kevin” li pêşiya AVMa Gunpaşê hatin gel hev. Kedkaran dirûşmên “Bijî 1’ê Gulanê”, “Ked a me ye, gotin a me ye” û “KHK dê biçin em ê bimînin” berz kirin. Li pêşiya kortejên sendîka, partiyên siyasî û rêxistinên civaka sivîl tê de cih digirin jî, endamên DFG û MKG’ê cih girtin. Rojnamegeran, bi pankarta “Çapemeniya Azad, Civaka Demokratîk” û bi dirûşmên “Çapemeniya Azad nayê bêdengkirin” û “Ji Nazim heta Cîhanê çapemeniya azad li vir e” meşiyan. Kortej heta Parka Aştiyê ya Mûsa Anter meşiyan û li vir dest bi mitînga xwe kirin.
Di mîtîngê de ewilî li ser navê Komîteya Amadekariyê Engîn Işik axivî. Piştre Hevşaredarê Bajarê Mezin ê Wanê Abdullah Zeydan axivî û wiha got: “Bi ‘Banga Aştî û Civaka Demokratîk’ ya Birêz Ocalan ji bo welat hêviyeke nû derketiye holê. Hêviya aştiyê li welat mezin bûye. Ev pêvajo pêvajoyeke ku wê her kes bi ser bikeve ye. Hêvîdarim ku girtiyên nexweş bên berdan û kesên ji kar hatine dûrxistin vegerin ser karê xwe. Divê dawî li pêkanînên qeyûm bê anîn, gelê Wanê di vê demê de dîrok nivîsand û bi destxistina her 14 şaredariyan bersiva pêwîst da hikûmetê.”
‘Ji bo demokrasiyê zagonan derxin’
Piştî axaftina Zeydan, Endama Lijneya Rêveber a Meclisa Konfederasyona Sendîkaya Kedkarên Kamûyê (KESK) Done Gevher Koyûn axivî û ev tişt anî ziman: “Îro gel bi xizaniyê re têdikoşe. Mafên me yek bi yek tê desteserkirin. Rojhilata Navîn careke din vediguhere qada parvekirinê. Desteserkirina vîna gelê me berdewam dike. Êdî li hemû qadên cîhanê dibêjin ‘êdî bes e’. Divê ji bo aştî û demokrasiyê zagonên ked, demokrasî û aştiyê bên derxistin û dawî li vê pêvajoya şer bê anîn”
‘Her roj 4 karker tên kuştin’
Herî dawî Hevseroka Giştî ya DBPê Çîgdem Kiliçgun Uçar jî di mitîngê de axivî. Çîgdem Kiliçgun Uçar, diyar kir ku yek ji welatên herî zêde kedxwarî lê tê kirin jî Tirkiye ye û wiha got: “Mirov li vir birçîtiyeke mezin dijîn. Li welatekê sînorê birçîtiy3e 24 hezar lîre û sînorê xizaniyê 78 hezar lîre, welatî mehkûmî 22 hezar lîreyan hatine kirin. Ji ber ku aboriya vî welatî ji bo şer û ewlehiyê tê xerckirin. Sedema ewqas krîzan, polîtîkayên şer in. Polîtîkayên şer û ewlehiyê bandorê li tevahiya jiyana me dikin. Welatiyên hilberînê dikin nikarin li vî welatî berhemên xwe bifiroşin. Aboriya vî welatî bi pîşesaziya parastinê xwe li ser pêyan digire. Bi vê pîşesaziyê re tenê zikê çendek kesên li cem AKP’ê têr dibe. Dîroka mirovahiyê, dîroka kedê ye. Divê ev keda ku berhema jin û ciwanan e, li her derê xwedî gotin be. Me tişta pergala kapîtalîst hêjayî gelên bindest dibîne tu caran qebûl nakin. Bi hezaran kesan ji bo vê bedena xwe feda kirin. Jiyaneke mirovane û pêkvejiyana gelan pêkan e. Her roj li Tirkiye û Kurdistanê 4 karker jiyana xwe ji dest didin. Ji bo pêşîgirtina vê, divê em bi hev re têkoşîna aştî û demokrasiyê bidomînin.”
‘Banga Ocalan ji bo herkesî ye’
Çîgdem Kiliçgun Uçar, bal kişand ser banga Rêberê Gelê Kurd Abdullah Ocalan û wiha pê de çû: “Banga birêz Ocalan ji bo gelan, kedkaran, jinan û ciwanan e. Em baş dizanin ku dikare vî şerî bide sekinandin û bi dawî bike. Demek berê dema em dihatin ber kortejê, destûr nehat dayin ciwan pankarta ku wêneyê birêz Ocalan li ser bû hilgirin. Gelo heke hûn tehemîla wêneyê birêz Ocalan nekin, hûn ê çawa biaxivin û em ê çawa aştiyê bikin? Her çend hûn destûrê nedin pankart têkeve qadê jî têkoşîna birêz Ocalan her tim di dilê gel de ye û dê her hebe. Têkoşîna hevpar a ji bo pêkvejiyanê ya gelê Kurd, dema bi têkoşîna kedkaran re bû yek, tu kes dê nekare xwe li pêşiya wê bigire. Em destûrê nedin kesên hewl didin mafên me yên jiyan û pêşerojê ji dest me bigirin. Rizgariya karker û kedkaran, girêdayî rizgariya gelê Kurd e. Heta karker û kedkar nebin, civakeke demokratîk jî nabe. Niha dema wê ye ku em deng û têkoşîna xwe bikin yek û welatekî demokratîk ava bikin. Ez, 1’ê Gulanê li birêz Ocalan û hevalên wî ku mezintirîn keda ji bo aştiyê wan da ye, pîroz dikim.”
Piştî axaftinan, hunermend Arhat derket ser dikê û mitîng bi dawî bû.
