Amed – Li Amedê di 31ê Gulanê de bi pêşengtiya TJAyê dê meşek werê lidarxistin. Parlamenterên Dem Partiyê Berîtan Guneş û Sabahat Erdogan Saritaşê jin vexwendin meşê û diyar kirin ku li qadê dê dengê jinan bilind bibe.
Tevgera Jinên Azad (TJA) dê 31ê Adarê li Parqa Şemsê Allak heta Qada Şex Seîd bi serenavê “Ji bo Aştiyeke Civakî û Çareseriyeke Demokratîk Jin Dimeşin” meşekî li dar bixe. TJA, Partiya Herêmen Demokratîk (DBP) û Partiya Wekhevî û Demokrasiyê ya Gelan ( DEM Partî) ji bo meşê amadekariyên xwe didomînin. Her roj tax bi tax digerin û gel vedixwînin meşê. Parlamenterên Dem Partiyê Berîtan Guneş û Sabahat Erdogan Saritaş ji Ajansa Welat re axivîn û gel vexwendin meşê.
‘Werin meşê dengê aştiyê bilind bikin’
Berîtan Guneşê diyar kir ku 31ê Gulanê seat di 4an de li Parqa Şemsê Allak heta Qada Şex Seîd ji bo aştiyê jin dimeşin û got: “Em gelê xwe vedixwînin meşê, werin meşê dengê aştiyê bilind bikin.”
‘Werin dengê xwe bidin dengê me’
Sabahat Erdogan Saritaşê diyar kir ku ew jin xwedî banga aştî û civaka demokratîk derdikevin û wiha axivî: “Li hember bişavtinê, li hember tundiya li ser jinê, li hember rizandina civakê û li hember bişavtina çand û zimanê me em bi daxwaza jiyaneke wekhev û hevpar sibê li Parqa Şemsê Allak heta Qada Şex Seîd dimeşin. Em bangawaziyê ji hemû jinan dikin werin dengê xwe bidin dengê me û hêza me xurt bikin. Em daxwaza aştiyê bi dengekî bilind û bi hêzeke mezin li Qada Şex Seîd bilind bikin.”
