Amed – Endama Meclisa Jinan a KESKê Ayşe Kuranê diyar kir ku heke di civakekê de jin xwedî maf be û gotin be ew civak dikare pêş bikeve.
Konfederasyona Sendîkayên Kedkarên Cemaweriyê (KESK), Konfederasyona Sendîkayên Karkerên Şoreşger ên Tirkiyeyê (DÎSK), Yekîtiya Odeyên Endezyar û Mîmarên Tirk (TMMOB) û Odeya Bijîşkan a Amedê li Navenda Kongre û Çandê ya Çand Amedê panela bi navê “Di avakirina aştiyê de jin” li dar xistin. Dayikên Aştiyê, Hevşaredarên DEM Partiyê û gelek saziyên jinan beşdarî panelê bûn. Endama Meclisa KESKê û moderatora panelê Ayşe Kuran Çiçek li ser armanca panelê ji ajansa me re axivî.
Jin dê çawa xurtir tevî pêvajoyê bibe
Ayşe Kuranê diyar kir ku di demeke dîrokî re derbas dibin û got: “Me xwest di vê dema girîng de, di avakirina aştiyê de rola jinê çiye, hêza jinê çawa bêtir xurt bikin, em bi hev re bişêwirin, nîqaş bikin. Ji bo vê jî me panelek lidarxist. Îro li Rojava pergalek avadibe. Di nav vê jin çawa taybetmendiya xwederdixe holê, bi hêza xwe, renge xwe çawa civakê avadike, di nav xebatan de cih digire, me xwest em nîqaş bikin.”
Jin nebe aştî pêk nayê
Ayşe Kuranê balkişand li ser konferansa yekitiya jinên kurd a ku dê li Başûrê Kurdistanê pêk were û wiha berdewam kir: “Heke di civakekê de jin nebe kirdeya aştiyê, ew aştî nîvco dimîne, aştiyeke rasteqîn pêknayê. Jin ku di civakê de xwedî maf be, xwedî gotin be ew civak dikare pêş bikeve. Di civakê de jin nebe kirde, aştî negengaz e. jinên kurd di aliye têkoşînê de pir pêşketî ne. Ev konferans jî ez bawer im dê rol û mîsyona jinan xurtir bike.”
