Rojnameger Huseyîn Aykol di 14ê Cotmehê de xwîn çûbû ser mêjiyê wî û îro jiyana xwe ji dest da. Hevserokatiya Konseya Rêveber a KCKê ji bo Huseyîn Aykol peyama sersaxiyê weşand.
KCKê bal kişand ser têkoşîna Rojnameger Huseyîn Aykol û wiha got: “Rojnameger û nivîskar Huseyîn Aykol, endamê tevgera Çapemeniya Azad, li nexweşxaneya ku lê dihat dermankirin koça dawî kir. Di demeke ku em dikevin saleke nû de wergirtina vê nûçeyê em pir xemgîn kir. Windakirina mirovekî wisa, ku jiyana xwe ji bo têkoşîna xwîşk û biratiya gelan, demokrasî û sosyalîzmê terxan kiriye, bêguman sedema xemgîniyeke mezin e. Em sersaxiyê ji malbat û hezkiriyên wî, civaka çapemeniyê, gelê Kurd û hemû gelên Tirkiyeyê re dixwazin.
Di berdewama daxuyaniya xwe de KCKê bal kişand rola rojnameger Huseyîn Aykol û derbarê mijarê de ev tişt gotin: “Huseyîn Aykol di pêşketina çapemeniya Kurdî de roleke girîng pêk anî. Ew di kevneşopiya çapemeniya azad de dengekî kedkar û fedakar bû. Tevî ku bi zehmetî û ne gengaziyên mezin re rû bi rû maye û qet dev ji helwesta xwe ya berxwedanê li dijî zilm û êrîşan bernedaye, di avakirin û berdewamiya bênavber a kevneşopiya çapemeniya azad de heta roja îro roleke mezin pêk aniye û bûye yek ji pêşengên wê. Her wiha, Huseyîn Aykol di teşhîrkirirna neheqî û êrîşên ku li gelê Kurd hatine kirin de, di raya giştî ya Tirkiye û navneteweyî de roleke girîng pêk aniye. Bi têkoşîn û hewldanên xwe, hem di têkoşîna demokrasiyê ya Tirkiyeyê û hem jî di têkoşîna azadiyê ya gelê Kurd de cihekî girîng girtiye. Rêber Apo xemgîniya xwe ya mezin ji ber xirabûna tenduristiya Huseyîn Aykol anî ziman, di her hevdîtinê de rewşa wî pirsî û daxwaza başbûnê û dîtina wî anî ziman. Em careke din xemgîniya xwe ya kûr diyar dikin û sersaxiyê ji malbat, xizim, dost, civata çapemeniyê û gelê me re dixwazin. Em bawer dikin ku gelê me û çapemeniya azad dê bîranîna rêzdar Huseyîn Akyol bi xurtî bilind bike.”
