Kemal Kurkut ê di Newroza 2017an bi destê polîsan hatibû qetilkirin li cihê ku lê hatibû qetilkirin hat bibîranîn.
Xwendekarê zanîngehê Kemal Kurkut ê ku di Newroza 2017an a Amedê de bi destê polîsan li cihê kontrolê ya polîsan a têketina qada pîrozbahiyê hatibû qetilkirin, li cihê ku lê hatiye qetilkirin hat bibîranîn.
Hevserokê Giştî yê Partiya Herêmên Demokratîk (DBP) Keskîn Bayindir, Hevserokên Giştî yên DEM Partiyê Tulay Hatîmogullari û Tuncer Bakirhan, gelek siyasetmedar, nûnerên saziyên demokratîk ên sivîl û welatî tev li bîranînê dibin.
‘Gelek şehîdên me yên Newrozê hene’
Hevserokê Giştî yê BDPê Keskîn Bayindir, di bîranîna Kemal Korkut de axivî û wiha got: “Beriya ku em têkevin qada Newrozê, em Şehîdê Newrozê Kemal Kurkut bi rêzdarî bibîr tînin. Ji qedexekirina Newrozan heta niha gelek cangorî û şehîdên me yên Newrozê hene. Lê yê herî zêde dilê me êşand Kemal Kurkut e. Li vê qadê hat kuştin. Em hêvîdarin ku ji niha û şûnde li her derê Kurdistanê Newroz bi kêfxweşî, dilxweşî û aştî bê pîrozkirin. Li ser bingeha azadiyê bê pîrozkirin. Di pîrozbahiyê de tu kes neyê kuştin, neyê binçavkirin û neyên girtin.
‘Em ê Newrozê bikin şahî û azadiya gelê xwe’
Heta pîrozbahiya Newrozê gihişt vê astê me gelek bedelên giran da. Bi sedan şehîd hene. Em şehîdên Newrozê û azadiyê bi rêzdarî wan bibîr tînin. Em soz didin şehîdê Newrozê Kemal Kurkut û hevalên wî ku em Newrozê bikin Newroza şahî û azadiya gelê xwe. Em soz didin gelê xwe ku êdî li çar aliyê Kurdistanê û cîhanê Newroz bibe Newroza aştî û azadiya gelê Kurd. Em ê li ser rêya Newroza azadiyê bimeşin. Newroz li gelê me û malbata Kemal Kurkut pîroz be.
Bîranîn bi danîna qûrnefîlan bi dawî bû.
