Riha – Hevserokê MED TUHAD-FEDê Kerem Canpolat ku di “Meşa çareseriya demokratîk û azadiyê” de cih digire, xwest tecrîda li ser Abdullah Ocalan rabe, demildest wî muxatab bigirin, piştgiriya gotinên wî bikin, bi lez pirsgirêka Kurd çareser bikin û mafên Kurdan nas bikin.
Di çarçoveya kampanya “Ji Abdullah Ocalan re azadî û ji pirsgirêka Kurd re çareserî” bi pêşengiya Platforma Saziyên Demokratîk ji Amedê ber bi Enqereyê ve di 16ê Kanûnê de “Meşa çareseriya demokoratîk û azadiyê” hat destpêkirin. Meş di roja duyemîn de li Rihayê bi daxuyanî û civînên gel û hevdîtina li gel Baroya Rihayê berdewam kir. Di civînan de behsa armanca meşê hate gotin û li ser çareseriyê nîqaş û axaftin hatin kirin.
Meş îro jî wê bigihîje bajarê Dîlokê û dê li vir jî meş û daxuyanî bên lidarxistin û bi civînên gel û hevdîtinên li gel saziyan berdewam bike.
Hevserokê Federasyona Komeleyên Hiqûq û Piştevaniyê ya Malbatên Girtî û Hikûmxwaran a Medê (MED TUHAD-FED) Kerem Canpolat jî ku di nav meşê de cih digire, derheqê armanca meşê de ji Ajansa Welat re axivî.
Kerem Canpolat: Bêyî çareseriyê xweşî jî nayê
Kerem Canpolat diyar kir ku ev çend sal in li Tirkiyeyê xitimandinek heye û wiha got: “Di her tiştên li Kurdistanê û Tirkiyeyê de xitimandin heye. Xetimandin di aliyê siyasetê û hiqûqê de heye. Xitimandina herî mezin jî li pêşiya çareserkirina pirsgirêka Kurd e. Em dixwazin vê xitimandinê vekin. Maka vê xitimandinê jî pirsgirêka Kurd e. Ji bo pirsgirêka Kurd çareser bibe, ev salek û nîv e me kampanyayek daye destpêkirin. Armanca vê kampanyayê jî ew e ku tecrîda li ser birêz Abdullah Ocalan bê rakirin. Çima ev tecrîd bê hilanîn? Çimkî dewletê di salên 2013-2015an de wî muxatab girtibû û pêvajoya çareseriyê dest pê kiribû û hinek xweşî çêbûbû. Daxwaza me ya sereke ew e ku ji bo çareseriyê pêvajoyek duyemîn bê destpêkirin da ku pirsgirêka Kurd çareser bibe. Heta li ser vê axê pirsgirêka Kurd çareser nebe, xweşî jî nayê Rojhilata Navîn.”
‘Divê demildest birêz Ocalan muxatab bê girtin’
Kerem Canpolat da zanîn ku gelê Kurd bi ziman, çand û reng û dengê xwe tê înkarkirin û wiha axivî: “Em dixwazin ku vê înkarkirinê bidin fêmkirin. Heta ku ev pirsgirêk çareser nebe, li vî welatî jî xweşî çênabe, li vî welatî di aliyê aboriyê de firehî çênabe, di aliyê ehlaq de başî çênabe, di aliyê siyasetê de xitimandin nayê hilanîn. Hemû pirsgirêk li Tirkiyeyê her tim xwe dubare dikin. Di warê edalet û hiqûqê de pirsgirêkên mezin hene. Ev hemû ji ber pirsgirêka Kurd in nayê çareserkirin. Lewma em dixwazin pirsgirêk bi muxatabê wê re bê çareserkirin. Em dixwazin demildest birêz Abdullah Ocalan muxatab bê girtin da ku ev mesele tavilê were çareserkirin.”
‘Divê piştigiriya gotinên Ocalan bê kirin’
Kerem Canpolat hevdîtina dawî ya li gel Rêberê PKKê Abdullah Ocalan bi bîr xist û wiha got: “Birêz Ocalan du meh berê di hevdîtina xwe de dîsa bang kir ku heke şert û merc werin afirandin dikare di demek kin de vê pirsgirêkê çareser bike. Em dibêjin gotinên birêz Ocalan gotinên bi qîmet in û em hemû piştgiriya van gotinan bikin. Ji bo çareseriyê û xweşiya Kurdistan û Tirkiyeyê.”
‘Çareserî li Meclisê dikare pêk were’
Kerem Canpolat li ser armanca meşa li Amedê dane destpêkirin sekini û got: “Meşa me piştî Rihayê wê li Dîlok, Edene, Mêrsînê bidome û li Enqereyê bidawî bibe. Armanca me ev e ku pirsgirêka Kurd demildest were çareserkirin û çareseriya demokratîk û azadiyê pêk were. Çareserî jî li Meclisa Tirkiyeyê dibe. Em jî dixwazin herin wir û xwestinên xwe ji muxatabê vê meseleyê re bêjin. Em hêvîdar in dewlet jî di aliyê çareseriyê de gav biavêje. Em dixwazin dewlet gav biavêje û çareseriyê piştguh neke.”
‘Em pêşî li krîzan bigirin’
Kerem Canpolat bal kişand ser geşedan û qewimandinên li Li Rojhilata Navîn û wiha pêde çû: “Li Rojhilata Navîn gelek krîzên nû rû didin. Em jî dixwazin gelê xwe ji vê krîzê bidin xelaskirin û gelê xwe mihafeze bikin. Ev jî ew e ku pirsgirêka Kurd bi qebûlkirina Kurdan û hemû reng û deng û motîfên Kurdan bê qebûlkirin. Bila pirsgirêka Kurd çareser bibe ku ev agir nekeve welatê me. Em dixwazin bi vê meşê pirsgirêka Kurd ji Meclisê re vebêjin û bala raya giştî ya Tirkiyeyê bikişînin ser vê yekê.”
‘Em dixwazin mafên Kurdan di ruhê xwe de qebûl bikin’
Kerem Canpolat bal kişand ser nêzîkatiya desthilatdariyê ya ji bo pirsgirêka Kurd û di dawiyê de ev yek anî ziman: “Desthilatdariya AKP-MHPê dema li îşê wan tê dibêjin pirsgirêka Kurd heye lê dema nayê karê wan jî ji qirkirina Kurdan re dengê xwe nakin û dibin şirîkê qirkirinê. Ji bo binpêkirina mafên Kurdan hemû derfetên xwe dixin dewrê. Em dixwazin hemû partî û muxalefet destên xwe bidin me da ku ev çareseriya vê meseleyê hêsantir bibe. Heke destê xwe nedin me çareserî ji bo wan jî nayê. Em dixwazin mafên Kurdan ne bi gotinan, di ruh û emelê xwe de bidin qebûlkirin. Ji bo çareserkirina meseleyê em dixwazin hemû kes destê xwe bide me û em dengê xwe gur bikin da ku çareserî bibe.”
