Wezîrê Enerjî û Çimeyanê Xozayî Alparslan Albayrak parekerdişê xo de îdia kerd ke PKK’yî dewa Berê Mîrî kerda tal. La dewijan wezîrî zureker vet û dîyar kerd ke leşkeran dewa înan kerda tal.
Medyaya girêdayeyê îqtîdarî detpêkê xoverdayîşê Têgêrayîşê Azadîye ra heta ewro bi seyan xeber û senaryoyê zurekerî nuştê. Talkerdişê bi hezaran dewanê vakurê Kurdîstanî de zî bi seyan xeberî zureker ê sey ‘Têgêrayîşê Azadîye dewe tal kerdî’ , ‘Têgêrayîşê Azadîye dewî veşnayê’ , bi rayîrê rojnamegeranê xo pare kerdêne. Tewr peyên Wezîrê Enerjî û Çimeyanê Xozayî Alparslan Albayrak 2 rojî ra ver medyaya dîjîtale ser o vîdeoyêk weşana. Kesêkê hetkarê AKP’yî vîdeoyî de vatêne, ‘dewa Berê Mîrê (Guleşlî) serra 1994î de hetê PKK’yî ra ameya talkerdene.’ Ajansê ma xo resna dewijanê na dewe û înan ra derheqê na babete de agahîyî girewtê.
Dewijan dîyar kerd ke Hêzê Artêşê Tirk (TSK) dewa înan kerda tal. Talkerdişê dewe ser o, dewijanê dewa Berê Mîrê agahî dayê Ajansê Welat. La dewijan seba ewleyî nêwaşt fotograf û vîdeoyê înan bêrê parekerdene. Her çend Wezîrê Enerjî û Çimeyanê Xozayî Alparslan Albayrak agahîyê şaş û bêesilî bi hewayêko vîdeo pare kerdê zî, dewijan dîyar kerd ke ê agahîyî zurî yê.
Bi teyareyanê şerî hêrişî derûdorê dewe kerdo
Dewa Berê Mîrê 1990î de Koyê Gabarî bi destê hêzanê artêşê tirk ameya talkerdene. Gulana 1994î de dima ke 9 cerdevanan çekî ronayê, leşkerî dewe ra vejîyenê. Hedîse ra pey çend rojî teyareyê şerî bi manayê ke endamê PKK’yî zereyê dewe de yê, derûdorê dewe bombarduman kenê. Bi taybetî Koyê Bizinan û Newala Kuştîya benê hedefê teyareyanê şerî.
3 dewijî bi îşkence yenê girewtene
Sereştişê keyeyan de dewijê bi nameyê Sabrî Yilmaz, Hamît Yilmaz û Abdûrrahîm Kûrtay bi îşkence yenê destbendkerdene û dima înan erşawenê hepisxaneyanê qezayanê Hezexî yê Şirnexî û qezaya Midyatî ya Mardînî.
Riyê hêrişan ra koç kenê, şonê dewa Dara
Nê hêrişan de xeylê banê dewe zerar vînenê û dewa ke 36 banan ra yena pê, dewijê aye bêçare manenê ke koç bikerê. Pêroyê dewijî mabênê 3 rojan de koç kenê şonê dewa Dara ya zereyê Koyê Gabarî.
Wazenê bi zor dewijan bikerê cerdevan
Dewijî bi îmkananê xo dewa Dara de konan ronenê û 6-7 aşmî konan de bi ca benê. La leşkerî reyna înan rê zilm kenê. Demêkî ra pey cerdavan û leşkerî erzenê dewa Dara ser o û zordarîye dewijan rê kenê ke ê bibê cerdevan. Na zordarîya leşkeranê TSK’yî ser o bi qasî 10 kesî benê cerdevan û dewijê bînî şaristanan sey Sêrt, Şirnex û Cizîrî ra vila benê.
Serra 1994î ra heta 2020 dewe tal manena
Serra 1994î ra heta 2020 derûdorê dewa Berê Mîrê qeleqol yan zî qereqol nêameyê awankerdene. La dima ke hetê TPO’yî ra Koyê Gabar de petrol yeno vînayene, artêşê tirk dest bi viraştişê qeleqolan keno. Nika pêroyê dewe de qeleqol ameyê awankerdene û xeylê cayanê dewe de zî qemerayî ameyê bicakerdene.
Seba dewe ra vejîyayîşî anons yan zî vengdayîş nêameyo kerdene
Nê agahîyê ke heta nika ma yew bi yew fekê dewijanê dewa Berê Mîrî ra girewtê û dewijanê dewe derheqê vîdeoyo de ke Wezîrê Enerjî û Çimeyanê Xozayî pare kerdo, dewijan vat ke ê agahî heme zurî yê û seba dewe ra vejîyayîşî tu wext anons yan zî vengdayîşêk nêameyê kerdene.
