Merdimê keyeyo ke dewa Berxbotan de ame kiştene vat ke sazîyê heqê merdiman kamca de yê û ganî teqez dewleta tirke hesabê nê qirkerdişî bida.
Hêrişo de ke vera dewa Berxbotan ê şaristanê Kobanê yê Vakûr û Rojhelatê Sûrîye ame kerdene de ma û pî û 7 gedeyê înan cuya xo vîndî kerde. Hêrişî de 2 kesî zî brîndar bîyê.
Nameyê keyeyê ser o Cîhan Mistefa ajansê ANHA’yî rê qisey kerd û wina vat: “Ê ke ameyê kiştene sivîl bîyê. Gedeyî tewrê ma û pîyê xo ameyê kiştene. Dewleta tirke reyna qirkerdişêo hovane kerd.” Cîhan Mistefa ard ziwan ke keyeyo ke ameyo kiştene, seba ke debara xo bikero dewe de ciwîyeno û wina vat: “Ma dewleta tirke ra vanê nê qirkerdişanê hovane rê êdî bes o. Qaşo dewleta tirke behsê aştî kena. Kamcîn aştî?”
Reaksîyonê vera sazîyanê heqê merdiman
Edlê Hecî wina qisey kerd: “Aşma Remezanî de zerrîya ma veşnaye. Dewleta tirke vera şarê sivîl qirkerdişêko hovane kerd. Sivîlan ra çi wazena? Sazîyê heqê merdiman kamca de yê? Çimanê ma ver qirkerdişê ke yenê kerdene, şima nêvînenê? Çira vera nê hovîtîyan bêveng manenê? Ganî dewleta tirke teqez hesabê nê qirkerdişan bida.”
