Hasan Kaya 40 serrî yo Çarşîya Şewitî ya Amedî de karê derzîtîye keno. Kayayî da zanayene ke mişterîyê ey Amed ra bigêre heta Ewropa kincanê kurdkî ey ra wazenê û va ke kurdê Ewropa hîna zaf kincan wazenê.
Çarşîya Şewitî, qezaya Sûrî ya Amedî de ya. Tarîxê na çarşîye zî kehen o. Çî yo ke ti biwazê tede est o. Zaf dikanî tede est ê û eşyayê ke bala ancenê, tede yenê rotiş. Na çarşîye bi cîyabîyayîş û zafçeşîdîya çîyan bala her kesî ancena xo ser. Her yew dikan bi rengêkê xo û weşîya xo mişterîyan arêkeno xo dorme. Şarê xocayî ra bigêre heta turîstê xerîbî yenê çarşîye û dayîşûgirewt kenê. La tay çîyî hîna zaf bala merdimanê ke teberê şaristanî ra yenê, ancenê.
Yewê dikanêdaranê çarşîye ra Hasan Kaya yo. Ey hê domanîya xo de dest bi kar kerdo û 40 serrî yo çarşîye de karê deştişê kincanê kurdkî keno. Hasan Kayayî dîyar kerd ke ey 13-14 serrîya xo de dest bi na senete kerdo û va: “Ez qijkekîya xo ra nata kincan deşena û karê mi dewam keno.”
Hasan Kayayî serrê xo yê dergî ke dayê na zenetî ardî xo vîr û wina vat: “Key mi dest bi kar kerd, ez zaf qij bîya, o wext ra heta nika ez nê karî kena. Musayîşê mi yê karî zî meraq ra bi. Key ustayanê mi parçeyê kincan birnayêne, zaf bala mi antêne. Zaf çîyan zî ez bi xo musaya. O wext îmkanê ma tay bî û ez mecbûr menda ke nê karî bikerî. La ez hê zî bi keyfweşîye karê xo kena. Heta nika zî wina dewam keno.”
‘Deştişê kincanê cinîyan merdimî eleqedar keno’
Hasan Kayayî da zanayene ke ey verê cû şalvarê cinîyan zî deştêne, la seba ke waştişê kincanê kurdkî yê camêrdan zêde ameyêne kerdene, ey cinîyan ra fek verada û wina qisey kerd: “Zehmetîya viraştişê kincanê cinîyan zî û yê camêrdan zî zaf a. Mîyanê kincanê cinîyan û camêrdan de zaf cîyayî est a. Kincê cinîyan kedêko pîl wazenê. Merdim pê zaf eleqedar beno. Kesê ke sey mi kincanê herêma Amedî virazenê, zêde nêmendî. Ez di karan pîya kena. Ez hem kincan deşena hem zî perwerdeyê govendî dana.”
‘Ma tewr zêde yê herêma Amedî virazenê’
Hasan Kayayî ard ziwan ke o goreyê waştişê mişterîyanê xo kincan virazeno û nê çîyan vatî: “Zaf mişterîyî yenê, bê ke kincan bideşnê yê ke mi amade kerdê, înan herînenê. Viraştişê caket û şalan, goreyê modelan reyna yew hefte, reyna zî ma hîrê rojan de qedînenê. Mîyanê deştişî de viraştişê tewr zehmetî yê caketan o. Key kar çinêbo, reyna yew-di rojan de viraştişê kincan qedîyeno. Mîyanê viraştişê nê kincan de tewr zêde yê herêma Amedî yenê viraştene û rotiş. Şalvar, yelek û şewqeyê ma yê heştgoşeyî, hîna zaf yenê rotiş û şar yeno sîparîşê nînan dano. Zaf mişterîyê mi estê ke teberê şaristanî ra zî wazenê. Zaf mişterîyê ma tîya est ê û heta Ewropa de zî est ê. Waştişê şarê ma yê Ewropa yê Amedî ra zêdêr o. Zaf kincê ke ez virazena, şar veyveyan û festîvalan de dano xo ra. Waştişê her kesî goreyê bejn û kîloyanê înan yeno û ma wina dest pêkenê.”
Fîyetê kincan
Hasan Kayayî behsê fîyetanê kincan zî kerd û peynî de wina vat: “Şalvar û yelek 2 hezar lîrayan ra dest pêkenê, heta 4 hezar û 500 lîrayan şono. Yê domanan zî zaf nêvurîyenê. Her çiqas kincanê domanan de qumaş zêde nêşono zî, la kar û deştişê înan yê pîlan ra zehmetêr o. Mîyanê înan de 500-700 lîra ferq est o. Tenya şal 2 hezarî ra heta 3 hezar lîrayan şono. Yew qatlixe 7 hezar lîrayan ra dest pêkena heta 11 hezar û 500 lîrayan şona. No zêdîyayîş qalîteyê qumaşî ra yeno. Ma raste-rast qumaşî fabrîqayanê Stenbolî ra wazenê. Heta ke destê ma ra yeno, ma yê tewr giran û başî anenê.”
