Ewladanê Ocaganê Dêrsimî ke Dêrsim de semedê paştîdayîşê prosesê aştîye eşkerayîye da, veng da temamê însananê bawermendan û biîqraran ke wa semedê aştîye ked bidê.
Ewladanê Ocaganê Dêrsimî, semedê paştîdayîşê prosesî eşkerayîye da. Eşkerayîya ke Meydanê Seyîd Rizayî de ameye dayene, Hemverfeka Komîsyonê Şaran û Bawerîyan ê DEM Partî Yuksel Mutlu, Endama TJA Gultane Kişanak û xeylêk kesî tewrê ci bîyî. Eşkerayîye de pankarta “Aştîye cemo tewr bimbarek o ke 72 miletî tewrê ci benê” ameye akerdene.
Endamê Ewladanê Ocaganê Dêrsimî, Pîrê Ocağa Şix Çobanî Îbrahîm Keteyî tîya qisey kerd û va: “Ma verê vîrameyîşê înan ê ke bêkefen şîyî erd, dardeyîz. Prosesanê şerî yê ke bêçareserîya meseleya kurdan ra vejîyayî, nê erdan ser o zaf xirabîyî viraştî. Çewres serrî yo ma bi giranî nê texrîbatî pîya ciwîyenê. Şerî zaf çîyî dayî ciwîyayene û zaf çîyî kerdî musayene. La tewr zêde qîymetê aştîye musna ma. Ma ewro sey ewladanê rayîrê yew bawerîye ke nê erdan ser o bi se serran o bi rizayîye, seyyewbînanîye, edalet, heskerdişê însan û tebîetî ameya hûnîyayene, semedê paştîdayîşê kedanê aştîye yê ke aktuelî de yenê rayraberdene, ameyî pêser.”
Îbrahîm Keteyî da zanayene ke nêzîkbîyayîşê pozîtîfî yê ke hetê erkanê dewlete ra yenê û Vengdayîşê Aştîye û Komelê Demokratîkî yo ke hetê Rayberê Şarê Kurdî Abdullah Ocalanî ra ame kerdene, semedê çareserîya demokratîke û aştîyane ya meseleya kurdan bîyê hêvîye semedê her kesî û wina domna: “Ma nê prosesî sey firsendêko pîl vînenê ke wa meseleyî bi şerî nê, bi diyalogî; bi nefretî nê, bi yewîya biîqrare ya şaran bêrê çareserkerdene. Aştîye, erkanê cemî yo tewr bimbarek o ke 72 miletî tewrê ci benê. Yewîya biîqrare ya ke bi hîşêbîyayîşê cemî virazîyaya, bawerîya ma de 73 miletî, yanî Guruyê Nacîye ya. Guruyê Nacîye reseno Komelê Demokratîkî yo ke xelisîyayo, resayo aştîye, emnîyet mîyan de bi huzûr ciwîyeno. Semedê aştîye xebitîyayene îbadeto tewr bimbarek o. Ma tîya ra vengdayîşê xo yê hetê ke wa temamê însanê bawermendî û biîqrarî zî bi nê kemalî semedê aştîye ked bidê, anê ra ziwan.”
Îbrahîm Keteyî îfade kerd ke aştîya raşte bi qebulkerdişê heqîqetî mîmkun a û va: “Ma sey dewamkerdoxanê ocage ke bi esran o kowe, dere û dergeh û meydananê nê erdan de ardîşê ziwanî yê kelamê Heqî sey wezîfe zanayê, reyna beyan kenê ke ma amade yê ke nê wezîfeyî bîyarê ca û bi kelamê Heqî semedê aştîye ked bidê.”
Dima ke eşkerayîye ameye dayene, loqmî ameyî vilakerdene û laçikê sîpîyî Heykelê Seyîd Rizayî ra ameyî girêdayene.
