Serekê Baroyê Amedî Abdulkadîr Guleçî dîyar kerd ke heqê girewteyan ê tewr bingeyînî yenê binpaykerdene, weşananê Kurdkîyan nêdanê girewteyan û girewteyî nêeşkenê weşananê Kurdkîyan biwanê, nê hetî ra qedexeyî est ê.
Baroyê Amedî, Komela Huqûqnasanê seba Azadîye (OHD) a Şubeyê Amedî û Komela Hetkarîya Keyeyanê Girewte û Hukimwerdoxan (TUHAY-DER) a Amedî raporê binpaykerdişê heqan ê hepisxaneyanê Amed, Erzîngan, Xarpêt û Erziromî raya pêroyî reyde pare kerdî. Seba parekerdişê raporî awanîya Baroyê Amedî kombîyayîşê çapemenî ame kerdene. Raporo ke bi Tirkî amebi amadekerdene hetê endama Komîsyonê Taqîbkerdişê Hepisxaneyan a Baroyê Amedî avûkat Rihan Gokî ra ame wendene. La çi heyf ke Kurdkîya raporî nêamebi amadekerene û na rewşe zî bala rojnamegeran ant.
‘Weşananê Kurdkîyan nêdanê girewteyan’
Wendişê raporî ra pey Serekê Baroyê Amedî Abdulkadîr Guleçî derheqê binpaykerdişê heqanê merdima ê ke gorewteyan de yê, ajanê ma rê qisey kerd û dîyar kerd ke heqê girewteyan ê tewr bingeyînî yenê binpaykerdene û wina vat: “Weşananê Kurdkîyan Nêdanê girewteyan. Girewteyî nêeşkenê weşananê Kurdkîyan biwanê. Rapor de est bi, mektubê ke birêz Abdullah Ocalanî rê yenê nuştene, nêyenê erşawitene. Reyna hepisxaneyan de polîtîkayê cînsîyetperest yenê kerdene. Xeylê girewteyê ke nêweşîyê înan ê giranî est ê la nêyenê veradayene, heqê înan ê tedawî yenê binpaykerdene.”
‘Binpaykerdişê heqan mîyanê komelî de bêhîbîyayîşî aver beno’
Abdulkadîr Guleçî da zanayene ke nê prosesî de nê kerdişî binpaykerdişê heqan, bawerîya komelî hemverê prosesî kêm keno û nê çîyî vatî: “Binpaykerdişê heqanê merdiman û heqanê girewteyan mîyanê komelî de bêvîbîyayîşî aver beno. Ma vanê ganî êdî nê binpaykerdişê heqan orte ra wedarîyê. Qeraranê Heyetê Çimdarî û Îdareyî yê Hepisxaneyan reyde înfazê girewteyan yenê veşnayene, veradayîşê înan yeno astengkerdene. Nê qerarî qerarê huqûqî nîyê. Nê heyetan de kesê huqûqnasî çin ê. Goreyê daneyanê Komela Heqanê Merdiman hepisxaneyan de hezar û 600 girewteyê nêweşî est ê. Nê 600 kesî nêweşîyê înan giran ê. Ganî nê prosesî de nê girewteyê nêweşî heme veradîyê.”
