Cenazaya şaîrê namdaro kurd Ehmed Huseynî dimayê merasimî, Amed ra ver bi Rojava ameye oxirkerdene.
Cenazaya Ehmed Huseynî ke 10ê adare de nêweşxaneyêkê Swêd de ke tedawîya nêweşîya kanserî dîyêne uca de şibi heqîya xo, seba kerdişê merasîmê oxirkerdişî arde Amed. Merkezê Kongre û Kulturî yê Çand Amedî de merasimê oxirkerdişî ame kerdene. Tabuta Ehmed Huseynî bi renganê kesk, sûr û zerdî ameye xemilnayene û tabutî ser o qerenfîlî ameye ronayene.
Merasimê oxirkerdişî yê Huseynî rêzgirewtişî reyde dest pêkerd û dima ra Koordînastorê Ma Musîcî Şêrko Kanîwar şîîre wend. Dimayê wendişê şîîre sînevîzyon ame temaşekerdene ke behsê cuya Ehmed Huseynî keno û qiseykerdişê xatirwaştişî ameyê kerdene.
‘Heqê ey est bi ke Kurdîstanêko azad bivîno’
Hemşaredarê Amedî yê Şaristanê Girdî Dogan Hatunî qiseykerdişê xo de îfade kerd ke roşnvîr û şorişgiran ra xatirwaştiş zehmet û wina vat: “A rast ma nêeşkenê vajê no xatirwaştişêk o, do her tim erdê Kurdîstanî de zerrîya heme kurdan de gandar bimano. Heqê ey est bi ke Kurdîstanêko azad bivîno. Do embazê to çîyê ke to temam nêkerdê, do binusê.”
‘Ma do rêça to ser o bê’
Hemverfeka Komîsyonê Ziwan, Kultur û Hunerî ya DEM Partî Cemîle Turhalli Balsak bale ant têkoşînê Huseynî yê seba Kurdkî ser o û vat: “Heskerdişê ey ê seba şarê xo kerd ke biafirno. Bêmabên seba şarê xo afirna. Şaîr, nuştox, welatperwer û têkoşerêko baş bi. Heskerdoxê şarê xo, Kurdkî û edebîyatê Kurdkî bi. Seba şarê kurdî vîndîbîyayîşêko pîl o. Hetê fîzîkî ra belkî êdî mîyanê ma de nêbo la têkoşîn û berhemê ey do her tim ma reyde bî. Ma do rayîrê ey ser o bî.”
‘Gedeyê kurdî do to xo vîr ra nêkerê’
Hemverfekê Înîsîyatîfê Yewîya Demokratîke Mehmet Kamaçî zî vat ke înan pirdê şîîranê Kurdkî vîndî kerdo û wina vat: “Seba şarê kurdî bi roşnîye û rayîr mojna. Dejê ma keyfweşîyê ma şîîranê xo reyde vatêne. Oxir bo merdimo delal. Şarê kurdî gedeyê kurdî do tu wext to xo vîr ra nêkerê.”
‘Seba edebîyatê Kurdkî estareyêka beriqîyaye bi’
Hemsereka PENa KURD Rojbîn Perîşan zî da zanayene ke Ehmed Huseynî seba edebîyatê Kurdkî estareyêka beriqîyaye bi û wina qisey kerd: “Bêşik ewro ma mamosteyêko pîl, roşnvîrêkê şîîra Kurdkî oxir kenê. O qasê herra xo qedîm, bi dej û xoverdayoxîya cuya xo ya sereberz, xatir wazeno. Seba o pêşenê şîîra Kurdkî ya modern bi, ey rayîr û şeklêko newe şîîr û edebîyatê Kurdkî akerd û ma heme wendişê ey reyde pîl bîyê. Mîrasê ey do emanetê heme nuştox, edebîyatkar û şaîranê kurd de bibo.”
‘Hêvîya agêrayîşî daye mi’
Nuştox Rizoyê Xerzî ke bi serran hemrayîya Ehmed Huseyînî kerda, ey zî wina vat: “Ehmed roşnî û estareyê edebîyatê Kurdkî bi. O nêmerd o, tena cayê xo bedilna. Cuya xo, fedayê Kurdkî û edebîyatê Kurdkî kerd. Kesêko sozdarê dej û keyfweşîya şarê xo bi. Seba ke edebîyatê Kurdkî Rojava de biciwîyo, xover da. Demo ke nêweş bi ma şîbî zîyaretê ey û ey hêvî dayêne ma. Ka huyayîşê to, do Amûdêya zerrîveş senî to pêşwazî bikera? Wa şehîdî bibê hemrayê to.”
Cenazaya Huseynî do Berê Sînor ê Xabûrî ra vîyara Başûr û uca ra zî ver bi Rojava bêra oxirkerdene. Dimayê qiseykerdişan cenazaya şaîrê kurd o gewre Ehmed Huseynî ver bi Rojava ameye oxirkerdene.
