Rayberê Şarê Kurdî Abdullah Ocalan, Konferansê Mîyanneteweyî yê Almanya rê mesaj erşawit û wina va: “Seba aştîya dayîme û çareserîya raşte, newe ra awankerdişê huqûqî û dezgehbîyayîşê sîyasetê demokratîkî, hewcetîyêka avzelî ya.”
Rayberê Şarê Kurdî Abdullah Ocalanî, mesaj erşawit Konferansê Mîyanneteweyî yê bi sernameyê “Şekildayîşê Pîya-cuyayîşî: Tirkîya de Prosesê Çareserîye û Perspektîfê Ameyoxî” ke hetê Komeleya Cigêrayîşê Aştîye ra şaristanê Bonnî yê Almanya de ame organîzekerdene.
Konferanso ke tede Prosesê Aştîye û Komelê Demokratîkî ame munaqeşekerdene, bi beşdarîya akademîsyen, sîyasetmedar, cigêrayoxan û temsîlkaranê komelê sivîlî dest pêkerd.
Mesajo ke Rayberê Şarê Kurdî Abdullah Ocalanî erşawito wina yo:
“Beşdaranê ercîyayeyan, dostanê qîmetinan;
Ez nê kombîyayîşê qiymetirî ke tede her kesê ke bawer keno aştîye yew prosesê awankerdişê komelkî yo û keda bêmîyan û qerardarî wazeno ameyo têhet, bi zerrî û can ra selam kena. Xebatê QAD’î ke nê amacî ser o rayra benê, xusûsen çerçewa meselaya kurdan de seba ardîş û pawitişê aştîye hewlê înan muhîmîyêka pîle danê cî. Aştîye, teyna seba kurdan nê, seba pêro şaranê herême rê hêvîdayene û bîqîmet a. Nê hewlî, hetê xurtkerdişê famdayîşî yê mîyanê şaran; pîya-cuyayîşê bi rûmetî û zemînê komelkî yê aştîye de wayîrê wesifê îlawekerdişêkê muhîmî yê.
Prosesê şorişî negatîfî ra vurnayîşê pozîtîfî
Gerek nê tewir xebatî, zemînê weşî ke tede nasnameyê cîya-cîyayî, dejê cîya-cîyayî û xeyalê ameyoxî yê cîya-cîyayî yew asoyê aştîye yê muşterekî de bêrê têhet, biafernê. Aştîye eynî wext de yew halê pêkerdişê komelkî yo ke tede edalet, yeksanî, azadî û hurmetî dezgeh bîyê. Asta tarîxîye ke ma ewro tede yê, wayîrê a xusûsîyetî ya ke qederê Tirkîya, Rojhelatê Mîyanênî û komelê kurdan tesîr bikero. No demo ke ma tede vîyarenê, firsendêk dano ke tede prosesê şoreşê negatîfî ra vîyartişê vurnayîşê pozîtîfî mumkun o; şer û bêhuqûqîye eşkenê bêrê vindarnayene. No vîyartiş teyna tercîhêko polîtîk nîyo, eynî wext de gêrayîşo ke raştîyê tarîxî û evrenselî ferz keno.
Aştîya dayîme û çareserîya raşte
Seba aştîya dayîme û çareserîya raşte, newe ra awankerdişê huqûqî û dezgehbîyayîşê sîyasetê demokratîkî, hewcetîyêka avzelî ya. No het ra qedînayîşê tetbîqatanê keyfîyan, bi lezûbez caardişê prensîbanê huqûqê evrenselî û qeraranê dezgehanê mîyanneteweyîyan muhîmîyêka pîle danê cî. Ez wazena ke no konferans bibo gamek ke îmkananê aştîye zêde keno, rayîranê çareserîye keno xorîn û derheqê ameyoxê muşterekî yê şaran de beranê neweyan akeno.
Ez herkesê ke seba aştîye keda xo danê bi hurmet selam kena, xebatanê şima de serkewtiş wazena.
Abdullah Ocalan
Girawa Îmraliyî”
