Rayberê Şarê Kurdî Abdullah Ocalan xeylê pêvînayîş û erjnayîşê xo de rewşa Îranî fîneno verê çiman û îqaz keno. Ocalan vano ke nakokîya Îran û îsraîlî tarîxî ya û îsraîl wazeno Rojhelato Mîyanên de astengîyanê vernîya xo yê sey Îranî hewano.
Ocalan pêvînayîşêk de vengdayîşê PJAK’yî keno û wina vano: “Teqez dore yena Îranî, Îran parçeyê pancina yê planê dîzaynî yo. Eke Îran çareserîyêk demokratîk ê heqê xoserîya kurdan qebûl bikero û rayîr akerde bo, eşkenê înan reyde bikewê têkilî, eksê ci înkar de israr bikero, ganî vera rejîmî xover bidê. Abdullah Ocalan PJAK’î ra waşt ke babeta yewîye îhmal nêkero û teqez têkilîyanê xo xurt bikero
Îran de şerê çetinî dest pê kerd. Îsraîl û Amerîka hêrişêko hîra vera Îranî da dest pêkerdene. Wina aseno ke bi nê şerî wazenê peynîyê rejimê Îranî ke 1979î de bi pêşengîyê Humeynî amebî ronayene bîyarê. Rejîmê Îranî yê Melayan bi kerdişanê xo yê şîdetî, îdam û qirkerî yeno şinasnayene. Bi taybetî Rojhelatê Kurdîstanî vera kurdan zordarîyêka girde ameyê kerdene. Nê sebebî ra demêko derg têkoşînê xelasîyayîşê şarê kurdî ke bi pêşengîya PKK’yî ameya dayene, Îranî reyde problemê înan bîbî. Serranê verênan ra heta roja ewro xeylê rêxistin û têgêrayîşî kurdan vera rejîmê Îranî xo rêxistin kerdbî. Yew nê rêxistinan ra ke tewr bi name û vengîya Partîya Cuya Azade yê Kurdîstanî (PJAK) ke ge-ge hem şerê çekdarî vera rejimê Îranî dana, la zaf reyan zî bi rayîrê demokratîk û bi rêxistinkerdişê şarî têkoşînê ke demokratîke rayrabena.
‘Îran nêverdeno ma bimirê nê zî ma kişeno’
Pêvînayîşêk aşma gulane de Abdullah Ocalan acizîyê Îranî yê prosesî Tirkîya erjneno û wina vano: “Biewnî 40 serra Îran nêverdeno ma biciwîyê, nê zî ma kişeno. Îran ma serê tetike de gêno. Îsraîlî nêzdîyê 40 serra mesela çareser nêkerda û ma meydan ra nê hewanayê. Îsraîl, Ereb, Îran, Ewropa, Brîtanya hemînan naye ser o hemsencîye awan kerda. No nîzam dewam keno: wa PKK şer bikero û wa Tirkîya mesela çareser nêkero.”
Nakokîya tarîxî yê Îran û Îsraîlî
Reyna pêvînayîşêke aşma hezîranê de Ocalan bale anceno serê nakokîyanê mabênê Îran û Îsraîlî de yê û wina vano: “Nakokîya Îran û Îsraîlî tarîxî ya. Verê Îsraîl Rojhelato Mîyanên de têkilîyêk Stratejîk Tirkîya reyde estbî ke verê Tirkîya proto-Îsraîl bî. Nika Îsraîl estbîyayîşêk daîmî Rojhelato Mîyanên de awan keno û wazeno astengîyan Îran zî mîyan de derbas bikero. Cayê ke destek dayene Tirkîya, nika wazeno destek bido kurdan. No proses 7ê teşrîna verêne dest pêkerd. Mi no dî, naye ra ez kewta dewre.”
‘Ganî kurdî xo baş bipawê’
Eynî pêvînayîşî de vengdayîşêk ey seba PJAK’î est o. Abdullah Ocalan nê îqazan keno: “Ez wazena naye PJAK’î ra vajî: eke bingeyêk seba diyalogî Îranî reyde bibo ganî nê diyalogî aver berê. La eke înkar û werankerdiş û neyarîye de dewam bikero, ganî ey pawitena xo bikerê. Bêşik ey do amadekarîya xo bi baldarî bikerê. La Îran dewletêka ke merdim sivike bigîro nîya; no hewayêk talûkeyo. Ez nêwazena reçeteyan pêşkeş bikerî, la ganî ey pawitena xorîn bikerê. Ganî ey xo baş bipawê. Ma nêeşkene destûr bidê tu cayê ke de kurdî bihelî yê.”
Îranê peşengîya cinîyan
Demêko nêzdî de aşma çeleyî de Ocalan behsê têgêrayîşê Îranî keno û serê pêşengîya cinîyan de vindeno: Nika Îran de çalakî est ê. Ez wazena rewşa ucayî bizanî. Cinîyan pêşengîya şorişê Îranî kerd. Cinîyê Qendîlî zî bi xo bawerê. Cinîyê ke pêşengîya şorişê îranî kerde, hewceyo ke zereyê xo de fedakarî û berpirsiyarî aver bidê. Cinî do pêşengîya demokrasî û aştîye bikerê. No seba Sûrîya, Îran û Tirkîya zî rast o.”
‘Rewşa Îranî muhîm vînena’
Abdullah Ocalan meseleya Sûrîya û Rojava de reyna bale anceno serê rewşa Îranî. Pêvînayîşê peyênî yê aşma sibate de wina qisey kerd: “Siba ya roja bîne çîyê winayînî do Îran de zî biqewimîyê. Ez nika Îsraîlî ra zêdetir, Îranî Muhîm vînena. Ganî baldarî bê, çewres serra Îran çîyêko wazeno keno. Îhtîmal est o ke bi tewrbîyayîşê îranî şerêko gird herême de vejîyo. Hewceyo ke ez hedî hedî tesîrê xo zêde bikerî.”
Hemkarîya Kurdan zarûrî ya
Eynî pêvînayîşî de Abdullah Ocalan dîyar keno ke Îsraîlî Sûrîya de heta astêke kontrolê xo viraşto û nê derheqî de wina vano: “Aseno ke bi peymana Parîsî Îsraîlî erdê Golanî garantîkerdo. Na rewşe bi Hukmatê Demkî yê Sûrîya, Tirkîya û dewletanê ereban zî da qebulkerdene. Başûrê Sûrîya sey herêmek tampon ê bazirganîya serbest girewto binê kontrolê xo. Nika do giranîya xo bido serê Îranî. Seba naye rewşa îranî çiqas şino bilez bena. Ganî hêzê ke ucayê baş amadekarîya xo bikerê.” Abdullah Ocalan sewbîna zî mesajê xo de hemkarîya kurdan zî dîyar keno û wazeno ke Rojhelatê Kurdîstanî de yewîya mîyanê xo û muxalefeto demokratîk ê Îranî reyde têkilîyê xurtî bêrê ronayene.
