Serekê Federasyonê Astengdaran û Endamê Komîteya Amadekar ê Rayîrşîyayîş Rûmetî Abdulmecît Yilmaz seba rayîrşîyayîş, vengdayîşê tewrbîyenê kerd û dîyar kerd ke amancê înan o yo ke bi nê rayîrşîyayîşî vengê xo biresnê heme Tirkîya û dinya.
Komîteya Amedekar a Komîsyonê Astengdaran a DEM Partî 29ê nîsanê de bi eşkerayîyêk dîyar kerd ke do 3ê gulane de “Rayîrşîyayîşê Rûmetî yê Astengdaran” virazê. Rayîrşîyayîş do 3ê gulane roja yewşeme saete 12:00 de vernîya bînaya Şaredarîya Amedî ya Şaristanê Girdî ra dest pêbikero û heta Parka Sumerî dewam bikero. Serekê Federasyonê Astengdaran û Endamê Komîteya Amadekar ê Rayîrşîyayîşê Rûmetî Abdulmecit Yilmaz têkildarê problemanê ke astengdarî cuyenê û rayîrşîyayîşê 3ê gulane Ajansê Welatî (AW) rê qisey kerd.
‘Problemê ke astengdarî cuyenê komelî ra zêdeyêrî yê’
Abdulmecit Yilmaz da zanayene problemê ke komel cuyeno ra zêdeyêr probleman cuyenê û vat: “Seba ma meselaya astengdarî zî est a, giranî probleman hîna zêdeyêr beno. Ma eşkenê vajê, mîsal îstîhdam problem o, xo resnayîşê çîyan zehmeto seba ma. Heqê ma yê perwerdeyî binê tehluke de yê û problemê girdî vejîyene vernîya kesanê wendekaran. Sewbîna welatê ke bi temamî budçeya ey welatî se ra 1.26 seba astengdaran bê, şima eşkenê se bikerê? Mesela Tirkîya de budçeya ke seba astengdaran heme budçeya pêroyî ya Tirkîya ameya abirnayene se ra 1.26 a, yanî se ra 2 zî nîya. Wexto ke merdim ewnêyeno nê tabloyî ra nêzdîbîyayîşê vera astengdaran vîneno. Wexto ke ma naye vanê tena dewlete rexne nêkenê, heme beşê dewlete mîyanê nê çîyî de yê. Rayberîyê herêmî ra bigîrê heta sazgehê dewlete yê bînan nê çîyî wina yê. Çi heyf ke hetê meseleya astengdaran de endêke wayîrê hişmendîyêke nîyê. Xora mîyanê komelî de xeylê problemê ma hemparê. Wexto ke ma qalê nê çîyan kenê xo tira cîya nêkenê.”
‘Ganî astengdarî krîzê ekonomî ra bêrê pawitene’
Abdulmecit Yilmaz vîrî vist ke Tirkîya de krîzêke ekonomî esto û wina domna: “Ma wazenê kesê astengdarî nê rewşa krîzî ekonomî ra bêrê pawitene. Semedê krîzê ekonomî komel heme probleman cuyeno. Naye razî ma endî nê welatî de şer nêwazenê. Ganî aştî bilez bêro nê welatî. Seba ke aştî serbikewo, seba ke reyna nê welatî de şer nêbo, seba ke reyna bi raya şerî kes nêbo astengdar, ganî serê de dewlete gama tewr muhîme bierzo û her di hetî zî seba prosesê çareserî yê problemê kurdî hesas têbigêrê.”
‘Vera binpaykerdişê heqanê xo ma do rayra şorê’
Abdulmecit Yilmaz bale ante serê rayîrşîyayîşê ke do 3ê gulane de bêro viraştene û wina vat: “Nê rayîrşîyayîşî de amancê ma yo yewin o yo ke ma vengê xo bi resnê heme Tirkîya û dinya. Çira? Hêrişê serê komelê astengdaran rastê ci ameyo astêke wina ke endî bîya meseleya “Rûmetî” Xora ma nameyê rayîrşîyayîşê xo sey “Rayîrşîyayîşê Rûmetî” bi name kerd, zafê reyan heqê ma yê astengdaran yenê binpaykerdene û astengkerdene.
Ma nêeşkenê heqê xo yê zafê çîyan nê welatî de destê xo fînê. Çî heyf komel zî na meseleya astengdarîya ma de wayîrê hişmendîyekê ma bieşkê na mesela rayraberê yan fehm bikerê. Ma zî semedê naye vat, ma do emser ra tepîya heta hêzê ma bibo, heta ma bieşkê, ma do seba kesanê astengdaran her serre roja yewşeme yê hewteyê verên ê gulane de “Rayîrşîyayîşê Rûmetî” virazê.”
Vengdayena rayîrşîyayîşê 3ê Gulane
Abdulmecit Yilmaz waşt ke heqê înan ê bingeyinî bêrê naskerdene û seba rayîrşîyayîşê 3ê gulane wina vengdayîş kerd: “Wa astengîyê vernîya heqanê ma wedarî yo. Nê welatî de xeylê astengdarî est ê. Kesê wendekar ê astengdarî wazenê heqê xo bıkar biyarê, la xeylê astengiyan ancenê, zafê probleman ra rî bi rî manenê. Ma vengdayîşê şarê xo û kesê ke nê mesajî bieşnawê kenê, roja yewşeme saete 12:00 de vernîya Şaredarîya Amedî ya Şaristanê Girdî ra heta Parka Sumerî ma do rayra şorê. Ma do uca forumêke virazê. Forum de kesê eleqedar, hevalê ma, serekê komeleyanê ma, do qisey bikerê. Bêrê hêz bidê ma û rayîrşîyayîşê ma.”
