Verê cû Serekê AKP yê Xarpêtî istifa kerd, dima ra dîmenê lacê ey ke eroîn şuxulneno, medyaya sosyale de weşanîyayî. Ey ra dima 6 serekê şaristanan ê bînan zî istifa kerd. Qeyd beno ke AKP de istifayî do dewam bikerê.
AKP de istifayê ke roja pancşemeyî dest pêkerdbî, dewam kenê. Hirê rojanê peyênan de 7 serekê bajaran eşkera kerd ke înan wezîfeyê xo veradayo. AKP de roja pancşemeyî Serekê Şaristanî yê Xarpêtî Şerafettin Yıldırımî û Serekê Şaristanî yê Muğla Haluk Laçinî istifa kerdbî.
Roja îne zî Serekê Şaristanî yê Semsûrî Faruk Bülent Kablanî, Serekê Şaristanî yê Nîgde Mustafa Ozdemîrî, Serekê Şaristanî yê Bedlîsî Kadîr Kostekçî û Serekê Şaristanî yê Çanakkale Omer Faruk Gokturkî istifayê xo îlan kerdbî. Peyênî de ewro zî Serekê AKP’î Selman Altaşî, hesabê xo yê medyaya sosyale ra eşkera kerd ke ey istifa kerdo.
Rojnameger Îsmaîl Saymaz beyan kerd ke Serekê Şaristanî yê Dêrsimî zî do istifa bikero, îdîa kerd ke endamê MKYK’î yê AKP û namzedê Serekê Şaredarîya Kadikoyî Velî Arslanî “‘semedê tayê dosyayê ey ê pîlan ra bêvengî ame dûrîkerdiş.”
Dîmenê ey ê eroînî weşanîyaybî
AKP de îstîfayo verên hetê Serekê Şaristanî yê Xarpêtî Şerafettin Yıldırımî ra amebî. Dîmenê lajê Yıldırımî Mustafa Seccad Yıldırımî ke eroîn şuxulneno, medyaya sosyale de vila bibî.
