TJA’yî vizêr Amed de deklarasyonê 8ê Adare eşkera kerd. Aktîvîstê TJA’yî Harîka Peker û Arzu Karaman venga heme cinîyan da ke xo rêxistin bikerê û vat: “Ma do nê 8ê Adare de hem seba aştîya domdare hem zî seba azadîya cinîyan têkoşînê xo xurtêr bikerê.”
TJA’yî vizêrî Amed de Qonaxê Cemîl Paşayî yê qezaya Sûrî de deklarasyonê 8ê Adare eşkera kerd. Aktîvîsta TJA’yî Harîka Peker îfade kerd ke bingeyê deklarasyonî xoverdayîşê Rojava yo û vat: “Nê hêrîşan paradîgmaya Rayberîye û azadîya cinîyan hedef girewt. Eke aştî biba na aşt girêdayeyê azadîya cinîyan a. Coka ma do têkoşînê xo xurtêr bikerê. Çîyo tewr gird azadîya cinîyan o, o zî girêdayeyê rêxistinbîyayîşê cinîyan o.”
Peker derheqê prosesê “Aştî û Komelê Demokratîkî” de vat: “No proses serkêşîya Birêz Ocalanî de aver şono. Ma sey cinî do tim paştê bidê nê prosesî. Ma do têkoşînê xo bingeyê netewa demokratîke ser o bikerê.”
Arzu Karaman zî vat ke ê sey cinîyanê azadan wayîrê paradîgmaya Birêz Ocalanî vejîyenê û vat: “Zîhnîyeto ke hêrişê Rojava kerd waştêne ke şorişê ke bi destê cinîyan virazîyayo betal bikero. Nêwazenê vengê cinîyan bivejîyo. Ma venga heme cinîyanê dinya danê ke wayîrê na paradîgma vejîyê û azadîye esas bigîrê.”
Karaman 8ê Adara heme cinîyanê têkoşeran rê pîroz kerd û vat: “Ma venga heme cinîyan danê ke wayîrê yewbînan vejîyê, rêxistinê xo xurtêr bikerê û komelê demokratîkî awan bikerê.”
