Albumo newe yê pîyê şehîdan, kedkarê muzîkê Kurdkî, Hunermendo Kurdîstanij Hozan Comerdî vejîya.
Nameyê albumê Hozan Comerdî yo newe “Xozan” o. Hozan bi kirmanckî yo. Çekuyanê “Xo” û “Zan”î ra yeno pê û manayê “Xozanayîş”î de yo. Albumî de 10 deyîrî est ê. Hunermend şîîrê Melayê Cizîrî, Melayê Batê, Pertew Begê Hekarî û Seydayê Tîrêjî weçînayê û albumêko taybet amade kerdo.
Albumo ke muzîkê qesîde û şîîranê tesawûfî ra ameyo amadekerdene, seba muzîkê înan 14 enstrumanî ameyê şuxilnayene. Amadekerdişê nê albumî 2 serrî girewto û aranjorê ci zî Hakam Akay o.
Albumê “Xozan”î hetê Art Recordsî ra ame vetene. Hozan Comerd do tewrê Newroze bibo ke do roja şemî Frankfûrtî de bêra pîrozkerdene. Do albumê xo uca de standê Art Recordsî de îmza bikero. Dinyaya ewroyîne de êdî albumê sey kaset û CD nêvejîyenê. Merdimî zafane bi QR Code goştarenê. Seba albumî kitabê cêbe ame amadekerdene. Nê kitabî de QR Code û vateyê deyîran ca gênê.
Şîîrê ke albumî de ca gênê, seba ke seserranî ra verî ameyê nuştene, tayê çekuyê înan nêyenê fehmkerdene. Kitabê cêbe de hem halê orîjînal yê şîîran hem zî halê înan o bi Kurdkîya ewroyîne tede ca gênê. Art Records şîîrî açernayî îngîlîzkî zî.
Maqamê qesîde û Şîîrê Sûfî
Hozan Comerd bi heyranîya xo ya edebîyatê tesawûf û muzîkê qesîdeyî yeno şinasnayene. No album nîşaneyê heyranîya ey o. Hunermendo ke ANF’yî rê qisey kerd wina vat:
“Wexto ke ma şaîranê xo yê tesawûfî wanenê, ma felsefe, trajedî û destanan vînenê. Mi waşt ke felsefeya înan muzîkî reyde bîyara têhet. Mesela mi Ehmedê Xanî 4 reyî wend. Reyna zî ez ci ra mirdî nêbîya. Merdim wazeno ezber bikero. Şîîrê erjê ma yê sey Melayê Cizîrî, Melayê Batê zaf xorîn ê. Ge-ge tena bi çekuyêk merdim beno dinyaya cîyaye.”
Hozan Comerd dewam kerd û nê malûmatî dayê:
“Mi waşt ke ez fîlozofanê ma fehm bikera. Nê semedî ra ma embazanê muzîkjenan reyde demêko derg xebitîyayê. 2 serrî yo ma studyo de yê. Ma waşt muzîk o ke layiqê felsefeya înan o amade bikerê. Ma studyo de tena xo rê muzîk nêviraşt. Ma vateyê înan erjnayî, ge-ge zî ma tena çekuyêk ser o bi saetan fikirîyayê. Nê erjî yê ma yê. Bi edebîyat û felsefeya înan sereyê ma berz o.”
Hozan Comerd qiseykerdişê xo wina qedêna:
“Bi desan serrî yo ma seba lazimtîyanê rojaneyan vazdanê. Ma şonê programanê vîrardişan, çalakîyan, pîrozbayîyan. Nê semedî ra tewrê ke ez ci ra zaf hes kena mi nêşina seba edebîyatê tesawûf û muzîkê qesîde rê wext abirna. No album seba ê heskerdişê manayê lêborîne zî xo de hewîneno. Ma merdimî kultur û hunerî yê. Wezîfeyê ma berzkerdişê moralê şarê ma yo. Wezîfeyê ma vatişê dej û zerrîweşîya şarê ma yo.
Kurdîstan de 40 serrî yo tofanêk est o. Ma qasî des hezarî şehîdî dayê. Şehîdê ma welatê ma pawit, welatê ma yo ke parçe bîyo, bi hewayêko ruhî kerd yew. Felsefeyêka girde vejîyaye orte. Na felsefe şarê ma pawit û kerd yew. Nê albumî de çîyêko ma tewr zaf dîqet kerd no bî: Ma hewl da muzîk o ke layiqê nê erjan o, virazê. Album do êdî destê goşdaran de bo. Ê do xebatanê ma bierjnê. Ez hurmetanê xo seba şarê ma pêşkêş kena.”
Eserê ke albumî de ca gênê nê yê:
Dil ji Min Bir
Vate: Meleyê Cizîrî
Muzîk: Hozan Comerd
*
Hezar Hezar Sal û Zeman
Vateyî: Rezaliyê Reşîd
Muzîk: Hozan Comerd
*
Bejna şepal
Vateyî: Pertew Begê Hekarî
Muzîk: Hozan Comerd
*
Husna Te
Vateyî: Melayê Bateyî
Muzîk: Hozan Comerd
*
Aşiqê Zulfa Reş im
Vateyî: Melayê Bateyî
Muzîk: Hozan Comerd
*
Sorgul î
Vateyî: Melayê Bateyî
Muzîk: Hozan Comerd
*
Des û Dû Îmam:
Vateyî û Muzîk: Hozan Comerd
*
Govenda Felekî
Vatê û Muzîk: Emîr Alî Yağan, Ferhat Tunç
*
Ti Kê Berbena û Gozelê:
Vateyî: Seydayê Tîrêj
Muzîk: Hozan Comerd
*
Muzîsyenê Albumî
Kesê ke albumî de sey muzîsyen û teknîkî ca girewtê, wina yê:
Music Producer: Hakan Akay
Mastering: Fisheye Music, Stefan Heger
Bass: Philipp Bardenberg
Piano: Clemens T.Orth
Tembur: Hakan Akay
Guitar: Klaus Bittner
Percussion: Fethi Ak
Daf,Tombak: Reza Samani
Traditional Violin:Metehan Dada
Ney: Eyüpcan Acikpazu
Santur: Kiomars Musayyebi
Violin 1: Rostislav Kozhevnikov
Violin 2: Barbara Streil
Viola: Justyna Sliwa
Cello: Teemu Myöhänen
Photo: Pîroz
