Şaredarîya Amedî ya Şaristnaê Girdî û şaredarîyê qezayanê merkezî bi munasebetê 25ê Teşrîna Peyêne xeylê çatrayîran de alê bi rengê mor ê haydarîya vera şîdetê cinîyan ser o aliqnayê û Amed bi rengê mor ame xemilnayene.
Amed de çalakî û xebatê bi munasebetê 25ê Teşrîna Peyêne Têkoşînê Vera Şîdetê Cinîyan ser o ya Mîyanneteweyî dewam kenê. Her roje û şewe xeylê qezayanê Amedî de çalakî yenê organîzekerdene. Şaredarîya Amedî ya Şaristanê Girdî û şaredarîyê Sûr, Peyas, Rêzan û Yenîşehîrî zî bi munasebetê 25ê Teşrîna Peyêne, xeylê çatrayîranê şaristanî de alê haydarîya vera şîdetê cinîyan ser o aliqnayê. Alanê moran ser o bi Kurdkî û Tirkî slogan û nuşteyî ameyê nuştene. Alan ser o sloganê emserr ê Têgêrayîşê Cinîyanê Azad (TJA), “Seba cuyêka azade û bêşîdete, vatişê nêqedîya, ma do şîdetî pîya vindarnê, ma vera şîdetî xover bidê” ameyo nuştene.
