Sereka Daîreya Kultur, Huner û Karanê Komelî ya Şaredarîya Şaristanê Girdî ya Amedî Zeynep Yaş seba Festîvalê Tîyatroyî yê Mîyanneteweyî yê Amedî wina vengdayîş kerd: “Kerem bikerê nê 10 rojan de tîyatroyê dinya û heme renganê cuye hîs bikerê. Bêrê ma temaya ‘Seba Aştîye Dîyalog’ mîyanê komelî de xurt bikerê.”
Tîyatroyê Şaredarîya Şaristanê Girdî ya Amedî (DBŞT) yê ke binê banê Serekîya Daîreya Kultur, Huner û Karanê Komelî de xebatanê xo domnenê, emser Festîvalê Tîyatroyî yê Mîyanneteweyî yê Amedî yo 11. bi temaya “Seba Aştîye Dîyalog” virazêno. Festîvalo ke do 22ê nîsane de dest pêbiko û heta 2ê gulane dewam bikero, do grûbê tîyatroyî yê 19 welatan ra Amed de bêrê têhet. Festîval de pêroyî 22 kayî do bêrê kaykerdene. Beşêke zêde yê kayan do Merkezê Huner û Kongreya yê Çand Amed de bêrê kaykerdene û hinî performansî zî do waranê akerde de vejîyê vernîya temaşekerdoxan. Çarçewaya Festîvalî de kayî, roportaj, panel, atolye û pêvînayîşê hunermendan zî do bêrê organîzekerdene.
Grûbanê tîyatroyî yê ke do xeylê welatanê sey Îtalya, Swîsre, Îran, Sûrîya, Tunus, Erebîstano Seûdî, Ûkrayna û Ûganda ra bêrê do eynî sehneyî pare bikerê û hemkarîya dayîşûgirewtişê kulturî bikerê. Amancê festîvalî bi rayîrê berardişê hunerî de mabênê cografyayanê cîyayan de dîyalog awan bikero.
Sereka Daîreya Kultur, Huner û Karanê Komelî ya Şaredarîya Şaristanê Girdî ya Amedî Zeynep Yaş, derheqê festîvalî de Ajansê Welatî (AW)rê qisey kerd.
‘Vera şer, dîyalogê merdimî’
Zeynep Yaş, qiseyê xo de dîyar kerd ke nê wextî de hewcedarîya tewr girde ya Rojhelatê Mîyanên de aştîya û wina vat: “Emser Tîyatroyê Şaristanê Amedî temaya xo sey ‘Vera şer dîyalogêko merdimî ke eşkeno seba cuye çareserîyêka başe bi ca bîyaro’ dîyar kerdo. Huner eşkeno nê dejî bi rengêko afirîner biresno zerrîya şarî, nê sebebî ra zî, ma mefhumê “Seba Aştîye Dîyalog’ sey temaya nê festîvalî vet vernî. No mesaj seba ma zaf muhîm o; semedê ke ma na bawerî de yê aştî seba ma hemînan a, taybetî hewceyîya aştî seba Rojhelatê Mîyanên est a. Mîyanê nê geşê şerî de tena sey çirûskêke ney, la sey çilayêka geşe ma wazenê bi nê mesajî û bi raya hunerî festîvalê xo rayraberê.
‘Tîyatro nişaneyê komelê averşîyaye yo’
Zeynep Yaş, dewamê qiseyê xo de bale ante serê taybetmendîya tîyatroyî yê komelî û dîyar kerd ke tîyatro tena huner nîyo, eynî wextî de ziwanê şarî yo. Zeynep Yaş wina dewam kerd: “Tîyatro pirdêko mabênê cuyêka rastîkene û cuyêka merdim wazeno ke hunerê xo tede bivîno. No helwêstê tîyatroyî hewldayîşêk roşnvîrî û nîşaneyê komelê averşîyaye yo.”
‘Bêrê ma pêro pîya heme renganê cuye hîs bikerê’
Zeynep Yaş, taybetî vengdayîşê tewrbîyayîşê ciwanan û heme şarî kerd û qiseyê xo wina qedêna: “Ma jenerasyonê newe û ciwanan dawetê nê festîvalî kenê ke ey bi ziwanê aştîye ameyoxêke baştir xo rê awan bikerê. Kerem bikerê nê 10 rojan de tîyatroyê dinya û heme renganê cuye hîs bikerê. Bêrê ma temaya ‘Seba Aştîye Dîyalog’ mîyanê komelî de xurt bikerê.”
