Goristanê Peyasî ke diregê ey ê roşnayî ameyê wedaritene û dizdîyayene, dêsê ey rijnayeyî yê, bi şuxulnayîşê tiryakî zî îxlalî yenê kerdene. Şênîyê taxe vanê: “Heta merganê ma rê zî rehatî nêdanê” û çareserîyêka lezûbez wazenê.
Goristanê Peyasî ke Taxa Peyasî ya qezaya Peyasî ya merkezê Amedî de yo û hema peyê banê xizmetî yê Şaredarîya Peyasî de ca geno, di serrî yo ke bêwayîrîye ra rewşa xo rê ameya caveradayîş.
Yeno îdîa kerdene ke goristan de diregê roşnayî ameyî wedaritene û dizdîyayene, desê dorûverî rijîyayî û seba ke kamera asayîşî çinî yê, kesê ke tiryakî şuxulnenê, kerrayanê goran vejenê û zerar danê ci. Cîranê taxe wazenê ke goristan hem hetê asayîşî hem zî hetê xizmetî ra bi hawayêko lezûbez bêro eyarkerdene.
Welatijê ke seba ozDiyarbakır.comî qisey kerd, bertekê xo wina ardî ziwan: “Texmînî di serrî verî diregê roşnayî yo 12 metreyîn dizdî û veşnayî. Çîyêko bi nameyê wijdanî nêmendo. Wa kamera û pawitoxî goristanê ma rê bêrê ronayene. Nê bêwijdanî merdanê ma ra çî wazenê?”
Welatijan va: “Eke Goristanê Yenîkoyî rê xizmet yeno dayene, ganî Goristanê Peyasî rê zî bêro dayene. Di serrî yo ke rayîrêk zî xizmet nêameyo kerdene. Goristanê ma bêwayîr o” û veng da rayedaranê şaredarîye ke wa wezîfeyê xo bîyarê ca.
