Tirşî viraştiş ke kulturê mutfaxê zengînî yê Amedî de tamanê muhîman ra yew o, sey yew edetî seserran o, yeno domkerdiş. Cenîyê keyeyan ê sûke, bi taybetî aşmanê payîzî de, dest bi hazirîya tirşî kenê û sifreyanê xo yê zimistanî zengîn kenê.
Amed de tirşî viraştiş, tenya teknîkê hazirkerdişê yew werdî nîyo, heman wext de sey mîrasêko kulturî yeno qebulkerdiş. Zerzewatê ke herême de resenê, sey îsot, balîcan, xetê, firingî (tomatêsî), kelm û sîr, bi metodanê edetîyan yenê tirşîkerdiş. Bi taybetî zerzewatê terz ê ke Baxçeyanê Hevselî ra yenê temînkerdiş, sey sirrê tamê bêhempayî yê tirşîyanê Amedî yenê zanayîş.
Amed de tewirê tirşîyan ê ke tewr zaf yenê tercîhkerdiş, mîyanê înan de xetê, îsotê tûjî, balîcan, kelm û tirşîyo têmîyan yenê meydan. Beharatê ke mexsûsê herême yê danê tirşîyanê Amedî tamêko xoser.
