Amed de ziwayî û çinkerdişê hewyanan, bî semedê krîzê citkarîye. Her ke şono hegayan de hûmara merreyan zêdîyena, no ser citkarîye de averberdiş nêbeno.
Citkarê Amedî, emserre îstîlaya merreyan reyde rî bi rî mendê, citkaran vergirewtişê zîyanbîyayişê beran destpê karanê dermankerdişî kerdê. Goreyê xebera Guneydogu Expresî Serekê Odeya Zîraatî Suleyman Îskenderoglu vato ke ganî verba îstîlaya merreyan, heywanê luye, mare û çeqelî nîrê çinkerdişî.
Populasyon qey zêdîyeno?
Hewna babete ser o Serekê Laboratuvarê Zanîngehê Dîcleyî Prof. Dr. Alaettîn Kaya zî va ke semedê meseleye est ê, finak demserra hemnanî de seba ke miqataya merreyan zaf bena, no ser populasyonê merreyan zêdîyeno.
Kaya wina va: “Germbîyayişê dinyayî zî seba zafbîyayişê merreyan beno semed. Çi heyfo ke sey heywanê luye, mare û çeqelî ke nûfûsê merreyan kêm keno, yenê qetilkerdiş. Çimkî citkaran, karanê citkarîye de zaf dermanî şuxulnenê. Hewna qet mîyanê hegayan de dar û daristan çîn ê, eke wina bibo, heywanan nêeşkenê nê warî de halîna xo bironê û şonê warê dûrî. No zî zafbîyayişê merreyan beno semed.”
