Platformê Sazgehanê Demokratîk bi amancê erjnayîşê prosesî şarî reyde ame têhet û hedîseyê peyênî ameyê munaqeşakerdene.
Platformê Sazgehanê Demokratîk bi amancê agahdarkerdiş û erjnayîşê hedîseyanê peyên ê Kurdîstan û Rojhelatê Mîyanênî qezaya Sûrî ya Amedî de kombîyayîşê şarî organîze kerd. Kombîyayîşî de derheqê prosesê Aştî û Komelê Demokratîk, hedîseyê Rojava û Komployo Mîyanneteweyî yê 15ê Sibate erjnayîşî ameyê kerdene. Hemşaredara Şaredarîya Sûrî Fatma Gulan Onkol, endam û rayberê rêxistina DEM Partî yê Sûrî, sazgehê komelkî, sîyasetmedar û xeylê welatijî beşdarê kombîyayîşî bîyê ke Salona Nîlgunî ya Qezaya Sûrî ya Amedî de ame kerdene.
‘Kurdî wirzîyayê lingan ser’
Koordînatora Merkezê Cigêrayîşanê Qadê Sosyo Polîtîkî Yuksel Genç dîwanî de qisey kerd û averşîyayîşê peyênî erjnayê. Genç ard vîr ke hêrişê girdî şarê kurdî ser o yenê kerdene û hemverê nê hêrişan de şarê kurdî her cayê dinya de mîyanê xoverdayîşêko bêemsal de yê. Genç Komployo Mîyanneteweyî yê 15ê Sibate zî ard vîr û bale ant komployo newe yê hemverê Rojavayê Kurdîstanî ser o. Kombîyayîşî de derheqê prosesê Aştî û Komelê Demokratîk de hedîseyê Rojava û komployê 15ê Sibate erjnayîş û şîroveyê beşdaran est bîyê. Dimayê erjnayîşan kombîyayîş bi pers û cewaban qedîya.
